Құрметті Baribar.KZ сайтының қолданушылары! Бүгін мен сіздердің назарларыңызға Samsung Electronics Kazakhstan және Baribar.KZ сайты бірлесе отырып ұйымдастырған "Samsung-тің наурыз көжесі" атты байқауына арнайы пісірілген Наурыз көженің жасалу жолымен бөліспекпін.
Жыл басы 22 Наурыз жақындағанда әрбір үйде келер жылғы тоқшылық пен ырыс, құттың жоралғысы ретінде дастарханға өзгеде ұлттық тағамдармен қоса міндетті түрде Наурыз көже пісіріледі. Түрік халықтарының ұғымында жеті саны қасиетті саналғандықтан Наурыз көжеге жеті дәм қосылады. Ата-бабаларымыздың айтуы бойынша бұл күні Наурыз көжені тойып ішкен адам жыл бойы молшылық пен тоқшылықта болады.
Наурыз көже дайындау үшін бізге:
- Су
-Сүрленген ет\қазы
-Жүгері жармасы
- Бидай жармасы
-Тары жармасы
- Айран
-Тұз
Наурыз көжеге қосылатын бұл 7 дәм сәттілік, байлық, атақ, кемеңгерліктің белгісі болып табылады.
Көжені дайындау үшін алдымен сүрленген ет пен қазыны жақсылап жуып (қажетіңізше тұз қоссаңыз болады), 2-2,5 сағат қайнатып қоямыз.
Негізінен көжеге соғымнан арнайы сақталған сүр ет қосылады.
Ет пісіп жатқанда жүгері мен бидайды жуып, қалауыңызша тұз қосып 1 сағаттай қайнатамыз. 1 сағаттан кейін тары жармасын саламыз.
Тары жармасының тез пісетіндігін ескере отырып тарыны салғаннан кейін көжені 15 минуттай ғана қайнатамыз.
Дайын етті майдалап тураймыз.
Сөйтіп туралған етті сорпасымен бірге дайын көжеге араластырып, суытып қоямыз.
Салқындаған көженің үстіне айран құямыз.
Наурыз көже дайын!
"Наурыз" мейрамының басты ерекшелігі бұл күні барлық адамдар өздері ренжіген адамдарды кешіріп, өзінің туған-туысқандары мен жақындарына, айналасындағы адамдарға барынша мейірімділік танытуы қажет. Сондай-ақ егер адам жеті үйден жеті дәмнен дайындалған Наурыз көже ішіп шықса жаңа жыл ол адам үшін сәтті болады деген сенім бар.
Ұлыстың ұлы күні Наурыз мейрамы құтты болсын! Наурыз әр шаңыраққа береке, байлық алып келсін!
_________________________________________________________________________________________
Наурыз көженің видео-нұсқасы:
Арнайы "Samsung-тің наурыз көжесі" байқауына Erke_ky3 :)
