Құм демекші, бұл құмның өзіндік қасиеті де жоқ емес. Ауыл тұрғындары құмға «шомылып», емдік шаралар жасайды. Ғылым тілімен айтқанда, бұл — «псаммотерапия» — (латыншадан аударғанда «psammos» — құм, therapia — емделу) құммен емделу. Ыстық құм көптеген ауруларға шипа. Ең алғаш құммен емделуді вавилондықтар бастаған деседі. Кезінде бұл емнің қасиеті жайында Геродот, Гален, Авиценна секілді ғалымдар жазған. Ыстық құм тірек-қимыл ауруларына, буын, омыртқа, бұлшық ет, бүйрек, жүйке аурулары, әйелдердің жыныс мүшелері ауруларына ем. Ем қабылдау кезінде 45-55 градусқа дейін қызған құмға денені көміп, тек бас пен жүректің тұсын ашық қалдырады. Осылай ыстық құмның астында ересектер 25-30 минут, балалар 10-15 минут жатуы керек. Кейін жарты сағат көлеңке жерде демалады. Аурудан айығу үшін бұл емді 10-12 күн қайталау қажет.
