Зияны бар-жоғын айтпағанда, бір тамақты жей беру жалықтырады ғой. Егер тіпті тек қана макаронмен ғана ауқаттанудан басқа мүмкіндік болмаса, оны былайша өзгертуге болады. Сіз оны май мен пиязға қуырдыңыз ба? Ендеше, енді макаронды суға бөлек қайнатып, пісіріп алыңыз. Ал май мен пиязды басқа ыдыста жеңіл қуырыңыз, үстіне үккіштен өткізілген бір сәбізді, сосын тәтті бұрыштың бір данасын, бар болса бір помидор немесе томат пастасын салып қызартыңыз. Үстіне аздап қана су құйып, 10-15 минут отта ұстаңыз. Сосын тарелкаға суға піскен макаронды салып, үстіне жаңағы тұздықты құйып жеуге болады (әрине, ет жоқ жағдайда дегенім ғой). Ал соншалықты зияны бар деп ойламаймын. Тек макарон өнімдері көмірсуларға (углевод) бай болғандықтан, адамның толуына әкеледі, тез тойындырады, сондай-ақ қуырылған тамақтың асқазан-ішекке ауырлық туғызатыны белгілі. Құрамында белок (етте, жұмыртқада мол болады) пен түрлі дәрумендер (көкөністерде мол) аз болғандықтан, ағзаңыз да сол пайдалы заттарға зәру болатыны сөзсіз.
