Жас келін босағадан оң аяқпен аттап кірген күннен бастап сол үйдің тыныс-тіршілігімен жақсылап танысып, іске бейімделгені дұрыс. Ұйқыға сергек, жұмысқа ширақ болу – келіннің басты міндеттерінің бірі.
Жаңа отбасында келін өзіне жүктелген жұмысты ғана атқарған дұрыс. Ең бастысы, үйде ененің де барын естен шығармаңыз. Сізге дейін үй шаруасын сол кісі атқарған, істегелі отырған жоспарларыңызды енеңізбен ақылдасып отырыңыз. Кейбір келіндер өзім білемге салып, енелерін ренжітіп алып жатады. Ондай олқылыққа жол беруге болмайды. Ыдыс-аяқ сылдырламайтын отбасы болмайды. Отбасы мүшелері бір-бірімен ренжісіп қалғанда, ақыл айтып араға түспеңіз. Сізге қатысты сөз айтылса, артық сөйлеп, ақталмаңыз. Шыдамдылық танытып, үндемеуге тырысыңыз. Келін мен ене арасындағы шекарадан аспаған дұрыс. Кейбір келіндер енесін туған анадай көріп, тым еркелеп кетіп жатады. Тіпті, күйеуінің кемшіліктерін анасына айтқандай етіп, ененің бетіне байқамай басып қалады. Алайда, уақыт өте келе мұның соңы көптеген келіспеушіліктерге әкеп соғады. Күйеуіңіздің кемшілігі жайында тіс жармаңыз. Мұндайда енеден ешқашан қолдау күтпеңіз. Ене қашанда келіннен өзін сыйлап, құрметтеуді талап етеді. Ал бауыр еті баласының кемшілігі жөнінде айтылған сөз оның құлағына түрпідей тиеді.
Кейбір келіндер отбасында орын алып жатқан сәтсіздіктерге енесін кінәлап жатады. Бұл – үлкен қателік. Себебі, әрбір адам өз қателігі үшін өзі жауапты.
Ене қаншалықты қатал болып көрінгенімен, немерелерін көргенде бауыр еті езіліп тұрады. Әже тәрбиесін көрген бала әлдеқайда мейірімді, ақылды болып өседі. Балаларыңызды әжесінен қызғанбаңыз. Ешқашан жұбайыңызға қарсы келіп, қатты сөз айтпаңыз. Ер адам әйелден бір саты жоғары тұрады. Осыны естен шығармаған әйел ерге де, елге де сыйлы болады
