Білесің бе, құрметтім?
Арасында дүрмектің,
Сені ұмытып кетерімді білмеппін...
Енді, міне, ойланатын күн жетті,
Арасында дүрмектің,
Әлдеқалай жүрмеппін.
Көп нәрсені сезіппін,
Сезіппін де, түйіппін.
Біреулерден жиіркеніп, біреулерді сүйіппін.
Біреулерден аласа, біреулерден биікпін.
Ақыры кеп,
Ат басын саған бұрдым, сүйіктім.
Арманым да, үмітім де,
Сенде екенін ұғындым.
Жәбір көрген сәбидейін, бауырыңа тығылдым.
Ұғындым мен -
Басқаларға жоқ екенін құнымның,
Ая, ардақтым, ая мені...
Алдыңа кеп жығылдым.
Білесің бе, ардақтым?
Саған деген асылымды әркімдерге арнаппын.
Өзімді-өзім алдаппын,
Кешесің бе, ардақтым?
Құлың болып қалмақпын.
