Бізге ұнаған бір шумақ...

Question

Өлең десе, өлермен болмайтын жұрт жоқтың қасы. Әңгіме әлгі "халау-лилауда" емес, әрине. Кәдімгі қара өлең туралы. Айтайым дегенім... өздеріңізге ұнаған мөп-мөлдір бір шумақты осы жерге жазып қалдыра аласыздар ма? Ең-ең дегендерін. Авторын да ұмытпасаңыздар екен.

Answer 1

Нендей сұмдық қатігез ең мұншалық?

Қайдан біткен жан иілмек тұмсалық?

Бар қасиеті бір өзіңнен табылып,

Бар сұлулық құлатты ғой табынып,

Ынтықтырып талай-талай жүректі.

Небір сұлу кірпік ілмей жүдепті,

Үзіп жейді уылжыған жемісті

Сенде үзші, жаным, құрбан дегізші

Жас құралай жан ләззәті емес пе?!

Жасқанбашы, еңсең түсіп егеспе.

Шынымды айтсам, есім кетті өзіңе.

Сезбегендей қитығасың несіне?!

Өліп-өшіп сүймесеңде қызғанам.

Сөйлеспедім енді қайтып тіс жарып.

Нендей сұлу, қатыгез ең мұншалық

Шарапаты тимек бұған Құдайдың

Жерде өзіңіз деп қана мен жылаймын.

"Мың бір түн" хикаясынан.

Answer 2

Қараңғы қазақ көгіне,
Өрмелеп шығып, күн болам!
Қараңғылықтың көгіне,
Күн болмағанда, кім болам?

                                                       С.Торайғұров.

 

Алыстан Алаш десе аттанамын,
Қазақты - Қазақ десе мақтанамын.
Болғанда әкем -Қазақ, шешем-Қазақ,
Мен неге Қазақтықтан сақтанамын!

 

Answer 3

Сен қазақсың себебі әкең қазақ,
Ақ сүт берген, ақ жаулықты анаң қазақ.
Ата-дәстүр салтымен ағып жатқан,
Денеңдегі қасиетті қаның қазақ.

Сен қазақсың себебі тілің қазақ,
Ізіңде еріп жүрген інің қазақ.
Бір қараған алыстан танитұғын,
Ақ дидар,мөлдір қара көзің қазақ.

Халықсын кең даланы мекен еткен,
Жер үшін ата-бабаң қанын төккен.
Тәуелсіздік туымды көрем бе деп,
Ежелден ата-бабаң арман еткен.

Сен қазақсың сол туға қолы жеткен,
Бақыт бұл басыңа қонып келген.
Биік ұста сол туды таба етпей,
Дұшпандарға сені бүгін аңдып жүрген.

Answer 4

Мен – қазақпын, ажалсыз анамын мен,

Құрсағыма сидырар даланы мен.

Пәк сәбимін бесікте уілдеген

Дәуірлермен құрдаспын, даламын мен.

Осындай боп білмеймін кімнен тудым,

Бәлки қайсақ, бәлки бір гуннен тудым.

Деп шатыпты біреулер «күннен тудым»

Жоқ, сірә, мен қара құл, күңнен тудым.

Мен қазақпын, белдімін, байтақ елмін,

Қайта тудым, өмірге қайта келдім.

Мен мыңда бір тірілдім мәңгі өлмеске,

Айта бергім келеді, айта бергім

Жұбан Молдағалиев

Answer 5

Өле берсін күншілдер күйігінде,

өз ғасырым өзімнің иінімде.

Ақ жаңбырлар тоздырған тау сияқты

Мен өлемін өзімнің биігімде .  

(Т.Айбергенов)

Answer 6

Tay дейтін алып жүрек Ана туған

Мен таулықпын!

Таудан мен жаратылғам.

Киіктің сүтін емін ержеткенмін

Қуат алып қыранның қанатынан

Мен таулықпын

Таудан мен жаратылғам.

Бұлт бүркеніп, жай отын ала туғам

Күн алғашқы сәулесін маған шашып

Маған келіп түнейді қара тұман.

Тау ұлымын

Тау - менің дәу бесігім

Мен оның  әуресімін, сәулесімін.

Асқар шыңдар желпиді бесігімді

Бір орамын ағытып сәлдесінің.

Мен - таулықпын!

Таудан мен жаратылғам.

Тау деген Ана туған дара тұлғам

...Тауға барып

Көкке ұшып кетсем бе екен

Ұстап алып қыранның қанатынан

Answer 7

Күлдей күңгірт шашы бар,
Тоқсан бесте жасы бар,
Көз дегенің — сұп-сұр көр.
Тасбиқ санап бүгіліп,
Жерге қарап үңіліп,
Көрсе ауыр күрсінер
Менің бір қарт анам бар,
Неге екенін білмеймін,
Сол анамды сүйемін!

Көзінде көк нұры жоқ,
Аузында жұмақ жыры жок,
Жалынсыз, усыз құшагы,
Иірілмейді жыландай,
Сөзі де жоқ құрандай,
Білгені — қазан-ошағы,
Жабайы ғана жарым бар,
Неге екенін білмеймін,
Сол жарымды сүйемін!

Ұйқы басқан қабағын,
Бастыра киген тымағын,
Жалқаулықты жар көрген,
Жүрген ескі заңымен,
Алдындағы малымен
Бірге жусап, бірге өрген
Алаш деген елім бар,
Неге екенін білмеймін,
Сол елімді сүйемін!

Сағымы сайран құрады,
Бораны ұлып тұрады,
Қыс — ақ кебін, жаз — сары,
Орманы жоқ, шуы жоқ,
Тауы да жоқ, суы жоқ,
Мәңгі өлік сахарасы
Сарыарқа деген жерім бар,
Неге екенін білмеймін,
Сол Аркамды сүйемін!

Answer 8

Мына сайт форумға айналып бара жатыр.

Comments

Өкінішті-ақ.

nurislam_kz 16.02.2011 пікір

---

осы жақсы жауап па енді? форумға айналып бара жатыр деген! бұдан басқа жақсы жауап бергендер бар екен! мысалы мен егер осы сұрақты қойған болсам, жақсы жауап деп  астында берілген жауаптардың бірін таңдар едім! мен үшін бұндағы жауаптардың бәрі жақсы! маған өте ұнады!!!

Не_знаю 15.06.2011 пікір

Answer 9

Ақылмен ойлап білген сөз,
Бойына жұқпас, сырғанар.
Ынталы жүрек сезген сөз,
Бар тамырды қуалар.
 

Адамды сүй, Аллаһтың хикметін сез,
Не қызық бар өмірде онан басқа?!

Үш-ақ нәрсе адамның қасиеті,
Ыстық қайрат, нұрлы ақыл, жылы жүрек.

Абай

Біліп айтқан сөзге құн жетпейді,

Тауып айтқан сөзге шын жетпейді.

Өзің білмесең, білгендерден үйрен,

Үйренгеннен ештеңең кетпейді.

(Төле би)

Comments

VK мен сізді Жастардан көрдім ау деймін қателеспесем)?

mr.SmiT 17.02.2011 пікір

Answer 10

Т.Айбергенов АНА

Арманыңды ақтарам ба жүрегімде тербесем,
Айға сіңлі, қарындассың қасиетті Жерге сен.
Мен өзінді теңдесі жоқ құдірет деп түсінем,
Сендік қуат мың есе артық Жердің тарту күшінен.

Сұлу әлем, әлем сұлу сен жаратқан адаммен,
Көк жолының қарсылығын қағып тастап барам мен.
Сендік қуат болар, бәлкім, басын иді көк маған,
Әр кез сенен туғанымды есіме алсам, тоқтаман.
Ал ұмытсам, ұмыт болып қаларымды білемін,
Ұмыт қалмау үшін менің шарқ ұрады жүрегім.

Шат жүріп-ақ қас қаққанша боламын мен шерменде,
Жетім емес кей ананың жетімдігін көргенде,
Көз алдымда жас дөңгелеп булығам да ызадан,
Маған тіпті сөз келмейтін ұяттардан қызарам.

Бұл дүниеге онсыз-дағы кеткен жоқ па көп есең,
О, аналар, кей пасықты жаратасың неге сен!
Тасбауырлар дүниеге келсін де, тез кетсін де,
Әлде өзгелер ондайлардан жиіркенсін дейсің бе?

Қай кеудені жылытады лапылдаған отпенен,
Өз кеудесін жылытуға құдіреті жетпеген.
Анаң саған керек болса, балаңа да сен керек,
Кезекпенен ауысатын ғұмыр ғой бұл дөңгелек.

Ана керек, о, адамдар, ана керек адамға,
Анасыздар аң сияқты күн кешіп жүр ғаламда.
Пікірімді ұнатпаған таптық та дер дананы,
Даналықтың қажеті жоқ сыйлау үшін ананы.
 

Answer 11

Қараңғы қазақ көгіне, 

Өрмелеп шығып, күн болам!

Қараңғылықтың көгіне,

Күн болмағанда, кім болам?

Мұздаған елдің жүрегін,

Жылытуға мен кірермін!

Еңбек, бейнет  тарауы

Рақатқа сарқылар.

Қыздырып күннің қарауы

Надандық теңізі тартылар.

Орны отайып көгерер,

Қызығын жайлап ел көрер.

Тұрмыс, тағдыр - бірі  де

Бұл мақсаттан бұра алмас;

Қаһарман, Рүстем, Әлі де

Бұрам деп жолда тұра алмас.

Сыланған жардың күлісі,

Алдандырмас бірісі.

Сұлтанмахмұт Торайғыров

Answer 12

Бақыт деген – сеніңбала күндерің,
Бақытсыз-ақ бақытты боп жүргенің.
Бақытын да, басқасын да білмеуің,
Бақытсыз-ақ ойнағаның, күлгенің.

Бақыт жайлы менің мынау білгенім.
Бақыт деген – бірде шаттық, бірде мұң.
Бақыты сол – тәрік етіп түндерін,
Бақыт іздеп азаптанса, кімде-кім.

Бақыт деген – әркімдерде бір арман,
Сол арманның шыққан жері құмардан.
Ал сен үшін бақыт деген дәл қазір –
Бақыт жайлы жаза алмаған шығармаң.

Бақыт іздеп, мал бақ, мейлің тас қала,
Бірақ, балам, мынаны естен тастама:
Бақыттысың, бақыт іздеп сорласаң,
Бақытты боп сорлап жүрсең, масқара!

Бақытың – мен, бақытым деп біл мені,
Мені білсең, бақытыңды білгенің.
Ал мен үшін ең бақытты күндерім –
Балам, саған бақыт іздеп жүргенім.

Answer 13

Қияр ем дүниенің бар қызығын,
Қас-қағым жалт қараған бір сәтіңе.
Шипа боп қалар еді-ау,сол бір қарас,
Өзегімді өртеген көп дертіме._____ ӨЗІМ.

Answer 14

Биылғы күз көңіліме бөтен күз.
Тансыппыз, табысыппыз бекер біз.
Болмас еді мұндай ауыр күрсіну.
Бөтен болып қалсақ егер екеуміз.

Answer 15

Өзгермес қалпы бұл өмір –
Бұл өмір солай әлде де,
Жанарыңды әркез тіге жүр,
Мен жақтан түскен сәулеге...

Ұ.Дәлейұлы