Біз ғана емес, барлық дамушы елдер, тіпті дамыған елдер де осындай кезеңнен өткен. Қазір бүкіл әлем бойынша кино өндірісінен түсетін жылдық кірістің 87 пайызы тек Голливудқа тиесілі, екінші орында француз фильмдері. Қазақ киносының көрерменсіз қалуына ең басты себеп - жаһандану үрдісі деп ойлаймын. Екіншісі бір себебі, біздің қоғамның тілдік ерекшелігі. Ел халқының жартысынан астамы ғана қазақ, оның ішінде қазақша фильмді көре алатындай деңгейде қазақ тілін меңгергендер қанша екенін білмедім. Кино индустриясы да кірісті көздейді, ол да бір өнеркәсіптің түрі. Фильмді түсірген күннің өзінде басқа елдермен салыстырғанда көп пайда түсе қоймайды. Сондықтан болар көрермен санын көбейту үшін қазақ тілі мен орыс тілін қатар қолдануға тырысатындары.
Біз кейде тым асыра сілтеп жіберетін сияқтымы. Аздап реалист болайық. Неге дамымаймыз? Мемлекет неге ақша бөлмейді? Айта-айта жауыр болған сол жаттанды сұрақтар. Қоғамның, халқымыздың, еліміздің өзіне тән ерекшеліктері бар. Біз "неге дамымайды?" деп сұрады екен деп дами салмайды. Сондықтан елімізге жаһанданудың қаншалықты әсер ететінін, халық саны, ел экономикасы мен кино индустриясының арасындағы байланысты, қос тілді қоғамның сипатын түсінген соң ғана сын айтайық. Режиссер түсіре алмайды, актер ойнай алмайды, сценарист жаза алмайды деп құр байбалам салудың қажеті жоқ. Көш жүре түзеледі. Қазақ киносының көші тоқтап қалған жоқ. Жүріп келеді, түзеліп келеді...
