ЖАҚСЫЛЫҚ ПЕН ЖОМАРТТЫҚТАН ЖАРЫСҚА ТҮСЕЙІК!
Жер бетіндегі бүкіл адамзат баласы Ұлы Жаратушы - Алланың алғашқы жаратқан саналы тіршілік иесін «Адам» және «Ман» деп тек қана екі есіммен және сонымен қатар ең алғашқы елді, яғни мемлекетті Қаз деп атайды. Осы үш есімнің үшеуі де Манқыстауда дүниеге келген. Адам атамыздың атын (қарашаңырағын) Адай ұстап отырса, Ман атамыздың атын Манқыстау ұстап отыр. Сонымен қатар бүгінгі күнге қазақ деген атпен жеткен, осы елдің түп атасы ӘЗ әулие атамыздың моласы да осы Манқыстауда. Сондықтанда, ол басын ӘЗ әулие бастаған, 360 әулиелі, киелі Маңғыстау деп аталады.
Қазақтың ең алғашқы ел екендігін қалай әлемге мойындатуға болады дегенге келсек, меніңше оның еш қиындығы жоқ. Тек қана қазіргі әлемдік деңгейде өткізіліп жүрген сайыстардың қатарына төмендегі жарыстарды қоссақ жетіп жатыр. Мысалы:
- Сөздің (тілдің) байлығына қомақты жүлде тағайындап, жарысқа шақырайық. Бүткіл жер бетінде Қазақтың Ана тілінен бай тіл жоқ. Ол жүлде өзімізде қалады. Біз бұл шарамен Қазақтың ана тілінің бүкіл әлем елдері тілдерінің Анасы екенін мойындатамыз.
Ең бірінші сөзінің есебі (шегі) жоқ авторлық құқық Ұлы жаратушы – Алла да, екінші «авторлық құқық» Қазақ та. Бұл күмәнға да, дауға да жатуға тиіс емес. Қазақтың сөздік қорында 20 000 000 астам сөз түбірі бар делінеді. Салыстыру үшін еске сала кетейін 1980 жылғы санақ бойынша ағылшындар 250 000, қытайлар 500 000 сөз түбірін жинай алған.
- Дәл сондай қомақты жүлдемен бүкіл әлем елдерін ақындар айтысына шақырайық. Біз бұл әрекетімізбен қазақтың тіл мәдениетінің бәрінен жоғары екенін мойындататын боламыз. Дәл біздегідей дамыған суырып салма айтыс өнері ешбір елде жоқ. Бұл жарысқа қырғыз бен қарақалпақтан басқа елдер қатыса да алмайды.
- Суырып салма күй (музыка) өнерінен жарыс ұйымдастырайық. Бұл өнер де бізден басқа еш бір елде жоқ.
- Олармен Ата тегімізді (рулық, тайпалық) шежіремізді білуден жарысқа түсейік. Бүкіл әлем білсін, кез-келген қазақ баласының өз Ата-тегін Адам атаға дейін тоқтамастан тарқата алатынын.
- Бүкіл әлем елдерінің әншілерін құстың тілінде ән салудан сайысқа шақырайық. Құстың (бұлбұлдың, аққудың, қаздың, торғайдың т.т.) тіліндегі әндерді қазақтан басқа еш бір елдің әншілері сала алмайды.
- Садақпен жамбы атудан, көкпардан, құс салып аң аулаудан бүкіл әлем елдеріне арнап сайыс ұйымдастырайық.
- Қазақша күресті бүкіл әлемдік олимпиада жарыстарының қатарына қосуға талаптанайық. Бастамасы бар.
- Бәйгенің мәресін 300 км-ге (қазір 40-50 ден аспайды) ұзартуды ұсынайық. Бүкіл дүние жүзінің аттары бұндай мәреге қатыспақ түгілі, бұндай қашықтыққа шаба да алмайды.
- Сірә да әлем елдерінде жарыстың түр-түрі өтіп жатыр ғой. Оларды ит жарысына да шақырайық. Қорықпаңдар, қазақтың сағатына 90 км жылдамдықпен жүгіретін тазысына еш бір елдің иті жете алмайды.
- Адами қасиетті, тарихты (шежірені), мәдениетті, адам баласына тек қана жақсылық жасауды, соған сәйкес ұлттық салт-дәстүрді т.т., бірінен кейін бірін, бүкіл әлемдік БАҚ арқылы дәріптеп жарысқа шақыра берейік. Егер біз осыларды жасай алсақ, бүкіл әлем Қазық жұртын (Қазақ елін) тез табатын (мойындайтын) және өз қазығына қайта оралатын болады. Адам баласының жақсылыққа жаны құмар болатынын басшылыққа алайық. Бұл үшін Қазақстанның БАҚ-на орыс тілі емес, Қазақтың Ана тілі иелік етуі керек. Бұқаралық ақпарат құралдары әлсіз елдің өзі де әлсіз болатынын естен шығармайық. Баяғы еврейлік большевиктер партиясы Лениннің басшылығымен ең бірінші болып почта, телеграф және өзге Бұқаралық ақпарат құралдарын қолдарына алу себебі де осы болатын.
Қазақтың аққу мен қаздай адалдығын, әділдігін, періштелігін, Сақтардың сақилығын, Бұзау Жеменейдің жомарттығын, Адайлардың мырзалығын кезінде бүкіл әлем мойындаған. Сондықтан да, қолы ашық, барын өзгелермен бөлісетін адамдарды Сақи, Жомарт, Мырза деп дәріптеген, әлі де солай атап жүрміз. Қолдарындағы барын берудей-ақ беріп, жетім-жесір, жарлы-жақыбай, кедей-кепшіктермен бөлісуден бәйге алғандар осылар. Олар кезінде дәл осы сияқты бүкіл әлем елдерін бәйгеге шақырып, бәрінен де бәйге алған. Сондықтан оларды Тау би, Алып би, Қас би (Каспий), Бас би, Қас шешен, Қас Сақ, Қас батыр, Бас батыр, Қас мерген, Қас ару, Хас ақын, Қас сұлу, Қас шебер деп, тіпті олардың астарына мінген аттарында Қас тұлпар, Қас дүлділ, Қас жүйрік деп атаған.
Қазақтың ерлігімен, елдігімен, даналығымен, көрегендігімен бүкіл әлемді тәнті етіп, қазақтың болмысын, адами ізгі қасиетін әлемге мойындатқан жағдайымыз, біздің бүкіл әлем елдері бойынша үшінші орында болып келетін ядролық қарудан бас тартуымыз. Әлем елдерінің «тентектері» қару шығарудан жарысқа түссе Украина мен Қазақ елі бұндай «жарыстың» қате екендігін бүкіл әлемге мойындатты.
Өз арамызда да, яғни облыс пен облыс, қала мен қала, аудан мен аудан, ауыл мен ауыл, көше мен көше, отбасы мен отбасы болып жақсылыққа: қарияларды қарттар үйіне тапсырмаудан, спирт ішімдіктерін ішпеуден, наркотик қолданбаудан, қылмыс жасамаудан, некенің бұзылмауынан, кәрі қыздар мен сүр бойдақтардың болмауынан, әрбір отбасының көп баланы дүниеге әкелуінен және оларды мықты азамат етіп тәрбиелеуден, мемлекеттік тілді білуден, ғылыми жаңалықтар ашудан, қысқасы елімізде адам баласына игілік істер жасаудың барлық түрлерінен жарыс ұйымдастырайық. Жарыс әділетті болуы үшін көрсеткіштерді әр бір он мың адамға шағып есептейік. Жылда Наурыз мерекесі қарсаңында қорытындысын шығарып, елге жариялап, қомақты жүлдемен марапаттап отырайық.
Ел қамын ойлаған «қалталы» қазақ азаматтары осындай шара өткізуден де, яғни жомарттықтан да сайысқа түсейік. Жеңімпазды, тіпті осы сайысқа қатысқан барлық азаматтарды бүкіл ел болып ардақтайық, алақанымызға салып аялайық. Олардың атын тарихи еңбектерге мәңгі өлместей етіп жазайық. Оларға Гинессаның кітабы сияқты арнайы кітап арнайық. Тура осындай кітапты керісінше жасағандарға да арнап, оны «қара» кітап деп атайық. Міне, Нұқ (Нүк) пайғамбар атамыздың атын иемденген үкіметіміздің атқаруға тиісті басты міндеті («Үк» деген сөз түбірі (өз түбі, сөздің атасы) осылай дейді).
Әлем елдеріне өз тарихын, әлемдік тарихты білуден жарыс ұйымдастырайық. Қорықпаңыз, біз бұндай жарыстан ұтпасақ, ұтылмаймыз. Бұл жарыстан жүлде алған елдердің бәрі (яғни ақиқатқа көзі жеткендер) Қазақты, яғни қазық жұртын өздері іздеп табатын болады.
Міне осылайша, тек қана жақсылыққа жарысайық. Осындай жарыстарға бүкіл әлем елдерінің қатысуын ұйымдастырайық. Қазақта «Асық ойнаған азар, доп ойнаған тозар» деген мақал бар. Бүгінгі Европа доп ойнаудан алдарына жан салмауда. Демек, бұл олар азып, тозып бітті деген сөз. Ал, біз сол доп ойындарына шығатын қаражатты мен айтқан жарыстарға салайық.
Жақсылыққа жарысу арқылы бүкіл әлем елдеріне Қазақтың бүкіл әлем елдеріне аға (Қаз аға) екенін, олардың ақиқаттың атасы екендігін, бүкіл адамзат мәдениетінің барлығы осы қазақ даласынан басталатынын әлемге мойындатайық. Осы шараларды іске асыратын бүгінгі буын ұрпақ Елбасымыздың айналасына жұдырық болып түйіліп, барлық жақсылық жарыстардан бәйге алып, бұл жолды Нұрсұлтанның Нұрлы жолы» деп атайық. «Қасымқанның қасқа жолы» мен «Есімханның ескі жолының» қасына «Нұрсұлтанның нұрлы жолын» мәңгі өшпестей етіп жазайық. Бұл жол өте ұлы жол. Қазіргі таңда бұл жолдан бәйге алу қазақтан басқа ешбір елдің қолынан келмейді. Міне осы жол біздің тәуелсіздігімізді сақтап, біздің Мәңгі ел болуымыздың кепілі болмақ.
«Елдің атын ері шығарар». Қалам иелеріне (ақын, жазушылар, тарихшылар т.т.) әлем елдеріне көсемсөз арнап, өз елінің (ұлтының) мәдениетін асқақтатып, әлем елдерін өрге сүйрегендердің де, керісінше жасағандардың да ұлты (руы, тайпасы) және олардың қай елдің (мемлекеттің) өкілдері екендігін өз шығармаларымыз да айшықтап отырайық.
«Ей, адамдар! Негізінде, Біз сендерді бір ер және бір әйелден жараттық, әрі сендерді бір-бірлеріңді танып, білулерің үшін халықтар мен рулар етіп жасадық» (Құран Кәрім. Әл-Хужурат сүресі. 13 аят).
Тәпсір: Аса ұлы Аллаһ адам баласының шығу тегі, түбі бір екендігін баян етті. Бүкіл адамзат Адам ата, оған Аллаһтың сәлемі болсын және Хауа анадан тарайды. Аллаһ олардан көп адамдар таратып, оларды бір-бірлерін тануы үшін үлкен халықтар, сондай-ақ кішігірім ру-тайпалар түрінде бүкіл жер бетіне жайды. Сондықтан әрбір адам өзінің шыққан тегін, елін білуі қажет. Алайда Аллаһтың алдында адамдардың ең қадірлісі – барлық жағдайда тек аса ұлы Аллаһқа бойсұнып, күнәлардан сақтанған ізгілері. А.Саъди. Бұл аятта нәсілшілдікке де (расизм М.Қ.), ұлтсыздыққа да (интернационализм М.Қ.) тыйым салынған. Қар: Әл-Манси.
«(Ей, Мұхаммед!) Біз саған кітапты (Құранды) ақиқатпен, өзінен алдыңғы кітаптарды растаушы әрі оларға куәлік етуші ретінде түсірдік. Енді олардың араларына Аллаһтың түсіргенімен үкім ет. Өзіңе келген ақиқаттан ауытқып, олардың көңіл құмарлығына ерме. Сендерден әрбір (үммет) шариғат пен жол белгіледік, Аллаһ қалағанда, сендерді бір үммет етер еді. Бірақ Ол сендерді Өзінің берген нәрселерінде сынамақшы. Сондықтан қайырлы істерде алдында болуға ұмтылыңдар (жақсылықтарға жарысыңдар)! Барлығың Аллаһқа қайтасыңдар. Сонда Ол сендердің қайшылыққа түскен нәрселеріңнің хабарын береді» (Әл-Мәидә сүресі. 48 аят).
Тәпсір: Ұлы Жаратушы - Аллаһ бөлек-бөлек ұлт, тайпа, ру болуды, оларға әртүрлі дінде болуды және ізгі істер (жақсылық) жасауда бір-бірімен жарысуды міндеттеп отыр.
Бұндай сайыстар әртүрлі әлем елдері мен ұлттары арасында үнемі болып келеді. Олар адамзатты бақытқа жеткізу жолында сайысқа түсіп, бірінен-бірі мәдениеттерін (жақсылықтарын) асырып, оны өзгелермен мойындатуға тырысқан. Оларды (осындай ізгі жақсылықтарды ұйымдастырушыларды) халық ата, пайғамбар, пір, дана, данышпан, әулие, хан, қаған, би, ақын, ғалым, ержүрек батыр (баһадүр) деп әспеттеген. Ондай сайыстар күні бүгінде де жүріп жатыр. Мысалы, төрт жылда бір өтетін Олимпиада спорттық жарыстары, білім, ғылым, өнер, ән, би, музыка сайыстары т.т. осылардың қатарына жатады.
«Тентек шоқпар жинайды», - деп қазақ мақалында айтылғандай қару-жарақ шығарудан да, кейбір елдер көршісін жаулап, жерін тартып алудан да жарысып келеді. Ал ақиқатында, жарыстың көкесі қару-жарақ жасау мен өзге елдің жерін жаулап алу емес, ол ұлы аталарымыздың жеткен жетістіктерін біліп, соларға ұқсап бағу, соларды мақтан тұту, солардың үлгілі істерін жалғастырып, жіберген кемшіліктерін де біліп, ондай жағдайлардың алдын алу, яғни адамзатты бақытты ғұмыр кешуге жеткізу болмақ.
ЖАҚСЫЛЫҚҚА ЖАРЫСАЙЫҚ!
Қожырбайұлы Мұхамбеткәрім, Маңғыстау
