Қытайлық блогер Қазақстанда Қытай туының желбірейтін күнін армандайды
Дата: 14 ноября 2014 в 14:43 Категория: Қазақша жаңалықтар
[Қытайлық блогер Қазақстанда Қытай туының желбірейтін күнін армандайды]
Ғаламтордағы «Живой журнал» блогплатформасында James Kellop атты блогер Қазақстанда Қытайдың туы желбірейтінін айтты. Бұл пікір көпшілік ортасында қызу талқылануда деп хабарлайды Алаш айнасы басылымы.
«Мен 50 жасқа келгенде Астанада, Ашхабадта, Ташкентте, Бішкекте, Кабул мен Душанбеде Қытайдың туы желбірейді деп үміттенемін. Осы елдердің биігіне Қытай туы тігілетіне сенемін», — деп жазады James Kellop.
Бұдан бұрын «Новая Национальная идея Украины на пути в Африку», «Земля лишных-китайских мир» жазбаларымен танылған, осындай жазбалары арқылы өзінің саяси көзқарасын жиі білдіріп отыратын бұл адамды сол сәтте «Қытайдың жансызы» дегендер де болды.
Ол өзі жайында оқырмандарына көп айтпайды. Тек өзінің америкалық екенін, негізгі ата-тегі чехтан шыққанын, орыс тілін жақсы білмейтінін, қазір Катарда екенін, қару-жараққа асқан қызығушылығы барын жаймен жіпке тізеді.
Дегенмен оның жазбаларын оқып, тілдескен оқырмандары, James Kellopтың қытайлық екенін бірден таныды. Оның сөйлем құрауы, сөйлесу мәнері қытай азаматы екенін айқындай түскен.
Бірақ ол бұл пікірлерге «Өзге елдердің тілін білу, дәстүріне қанығу, адамдарымен тілдесу бұл менің жұмысым. Мұнда тұрған дәнеңе жоқ» деп ақталған.
Ол өз жазбаларында Қазақстанның ұлан-байтақ жерде жалғыз Астананы ғана тұрғызғанын, Қазақстандықтарға алып Қазақстанды тұрғызуға, дамытуға көмектесу керектігін айтқан.
«Оларға бір-бірін талап жеуге көмек беру керек. Олар алып Қазақстанда бір ғана Астананы тұрғызды. Ал елдің қалған аймағы кедейшілікте өмір сүруде. Елдің элитасының менталитеті африкалықтарға ұқсайды. Елдегі элита өздеріне ешқандай қажетсіз нәрселерді сатып алу үшін жер ресурстарын сатуда», — деп жазады James Kellop.
Сондай-ақ, ол Қазақстанда қазақтарсыз өмір сүру, проблемаларды қазақтарсыз шешу оңайырақ болатынын, 17 млн қазақстандықтың өте мол ресурстарды тұтынуы, жерінің тең жарымының бос жатуы әділдікке жатпайтынын да жеткізіпті.
Тіпті, Қазақстан халқын үлкен қалаларға емес, жапан түздерге қоныстандыру керек деген пікірін де жазыпты блогына.
Оларға бір-бірін талап жеуге көмек беру керек. Олар алып Қазақстанда бір ғана Астананы тұрғызды. Ал елдің қалған аймағы кедейшілікте өмір сүруде. Елдің элитасының менталитеті африкалықтарға ұқсайды.
Осы жазбасы арқылы Қазақстанның ел болуына, алып Қазақстанды дамытуға көмек керектігін айтқан James Kellop болашақта Қазақстанға Қытай Халық Республикасының көмекке келетінін, осылайша Қазақстанда Қытайдың туы желбірейтінін айтады.
Еске сала кетейік, бұған дейін ресейліктер Владимир Жириновский мен Эдуард Лимонов қазақ елінің Тәуелсіздігіне нұқсан келтіріп, Қазақстанның біршама облыстарын Ресейге қосу керектігін айтқан болатын.
