![enter image description here][1]Бірнеше жүздеген жылдардан бері әлемнің әр түкпірінен археологтар мен қарапайым адамдар қазба жұмыстарын жүргізген кезде жер астынан алып адамдардың сүйек қаңқаларын тауып келеді (суретте). Қаңқалар адамдардыкіне ұқсағанымен олардың басы үлкен, ал жақ сүйектеріндегі тістердің екі қатар болып орналасуына қарап, оларды нағыз адам деуге келмейтін секілді. Бір қызығы, барлық табылған сүйектердің ұзындығы 5-7 метрдей болған. Кейбір ғалымдар олардың адам сүйектері емес екенін айтады. Сонда кімдікі болғаны?
Олар біздің планетамызда қалай пайда болған? Қайдан келген және қай замандарда өмір сүрген? Өкінішке орай, бұл сұрақтардың ешқайсысына нақты жауап табылған жоқ. Мүмкін мына суреттердің осы уақытқа дейін жұрт көзінен таса болып келгенінің себебі де олардың жерліктер болмауынан шығар. Яғни мұндай тіршілік иелерінің болғандығы туралы жалпақ жұртқа жарияламау керек болған шығар, кім білсін?
Дегенмен кейбір ғалымдар олардың қалай пайда болғаны туралы ғылыми жорамалдар жасап үлгеріпті. Олардың жорамалына қарағанда, бұл сүйек қаңқалары адамдардың өте ерте заманғы арғы тегіне тиесілі көрінеді. Тіпті адамдарды өзге планетадан Жерге қоныс аударған осы алып тіршілік иелері жасаған деген әңгіме де бар. Бірақ анық солай ма? Оны бір Құдай біледі. Ал енді ғалымдардың алып тіршілік иелері мен адамдардың қалай пайда болғаны туралы жасаған долбарларынан үзінді келтірейік.
«Адамдарды осы алыптар жасаған, яғни адамзаттың тіршілік етуіне негіз болған осылар, – делінеді әлгі ғылыми тұжырымдамада. – Ал ол алыптардың өзі Жерге өзге әлемнен, яғни басқа планетадан қоныс аударған. Оларды осы жаққа қоныс аударуға қандай жағдай жағдай мәжбүрледі? Ғарыштың тым түкпірінен олар бұл жаққа не іздеп келді? Бұл сұрақтарға әзірге жауап табылған жоқ. Дегенмен олар осы Жер шарына көңіл аударып, осында тұрақтауды, мүмкіндік болса Жерді өздерінің мәңгілік мекені етуді көздеген болса керек. Себебі мұнда тіршілік етуге қажетті нәрсенің бәрі болды. Ең бастысы, сол кездері мұнда ешқандай ақыл иесі жоқ болатын.
Осылайша олардың артынан алыптар легі ағылып келе бастады да, олар жер бетінде өздерінің колониясын құрды. Бірақ көп ұзамай алыптардың алдынан келеңсіз кедергілер шыға берді. Яғни оларға қорғану мен тамақ табу секілді жұмыстарға көп уақыт бөлу керек болды. Соның кесірінен алыптар Жерге келгендегі негізгі жұмыстарына бел шешіп кірісіп кете алмай жатты. Сол себепті оларға енді көмекші немесе құлдар қажет болды. Бірақ оларды динозаврлар мен ұшатын кесірткелер және басқа да қорқынышты мақұлықтар жайлаған Жер шарынан қайдан тапсын?
Міне, осы кезде алып тіршілік иелерінің арасындағы ғалымдар ерекше бір тәжірибе жасауға кірісті. Олар өздерінің тіндерінен алынған ДНК арқылы клондау әдісімен дене бітімі жағынан өздерінен әлқайда кішкентай тіршілік иелерін жасап шығаруға бел буды. Бірақ олардың бұл ісі кейін жылдар өте келе өздерінің түптеріне жететін ол кезде алыптар білген жоқ еді.
Алыптар ойлаған ісін жүзеге асырды. Алғашында бәрі де жақсы болып жатты. Өмірге келген алғашқы кішкентай тіршілік иелерін олар «Адамдар» деп атады. Бойы небәрі бір жарым метр, салмағы 50 килограмнан аспайтын адамдар алып тіршілік иелері үшін өте тиімді жұмыс күші болды. Себебі олар алыптарға қарағанда тамақты аз жейді, әрі солар үшін тынбай жұмыс істейтін. Ол адамдардың миындағы өзіндік генетикалық қорғаныш оларға тым көп ойлануға мұрша бермей, тек жұмыс істеуді ғана білдіріп тұратын.
Алыптарға керегі де осындай көп ойлануға қауқарсыз, бастары бірікпейтін, тек айтқанға көніп, айдауға жүретін құлдар еді. Сонымен қатар алыптар адамдардың бойына өздеріндегі іштарлық, көрсеқызарлық, қорқақтық және ашкөздік секілді жағымсыз қасиеттерді де ендірген. Сондай-ақ адамдарды ары қарай клондап жатпас үшін олардың ағзасына өздігінен көбейе алатын қасиеттер де дарытты. Соның арқасында адамдар санаулы жылдар ішінде көбейіп шыға келді. Енді алып тіршілік иелеріне өздерін асырау үшін жұмыс істеудің керегі болмай қалды. Себебі олар үшін ең лас, қауіпті әрі ауыр, көп ойланып жатпайтын жұмысты адамдар істейтін болды. Ал адамдар ол кезде сөйлей де алмайтын, тым сылбыр, әрі еріксіз болған еді. міне, ең алғашқы жерліктер осындай болған.
Бірақ күндердің күнінде алыптар үшін осындай жайма-шуақ тіршілікке де бір зауал келді. Оған алыптардың арасындағы генетик-ғалымдардың өздері кінәлі. Яғни олар өз тәжірибелерінде бір қателікке жол берген.
Адамдарды қолдан жасау кезінде олар өз тұқымдастарының молекулаларынан тек өзгертілген ДНК-ны ғана емес, сонымен бірге алыптарға тән ауру түрлерін де ендірген болатын. Бұл кеселдер ада ағзасында біразға дейін тіршілік етті де, уақыт өте келе вирустар мутацияға ұшырады. Соның салдарынан көптеген басқа да ауру түрлері пайда болды. Бірақ ол кеселдер адамдар үшін онша қауіпті болмағанымен алыптардың өміріне қауіп төндіріп еді. Яғни ауа арқылы таралған кесел алып тіршілік иелерін қынадай қыра бастады. Оған қарсы дәрі ойлап табуға уақыт тым тар болды. Алыптар колониясы асқан жылдамдықпен жойылып бара жатты.
Сырттан Жерге алыптар келуі дереу тоқтатылып, керісінше Жердегі дәулер мен олардың өлген тұқымдастары дереу ғарыш кемелерімен әкетіліп жатты. Осылайша көп ұзамай алыптар қауымдастығы Жерден біржола жойылды.
Қожайынсыз қалған адамдар да осыдан кейін дүние жүзінің түкпір-түкпіріне шашырап кеткен болатын. Алдымен қауым болып тіршілік етіп көрген адамдар уақыт өте келе бастары бірікпей жан-жаққа шашырап кетті. Одан кейін адамдардың тілі шығып, сөйлеуді, жазуды, кейін тіпті мемлекет құрып, тайпаға бірігуді меңгерді. Дегенмен адамдардың бойындағы алыптар қалдырған генетиткалық кодтың кілті сол күйі ашылмай қалып қойды. Соның кесірінен адамзат әлі күнге дейін біріге алмай келеді.
Осы уақытқа дейін Жер шарында мыңдаған тайпа мен ұлыстар, жүздеген мемлекеттер бір-бірімен ашық айқасып, соғысып келе жатыр. Адамдарды жаратқан алыптардан қалған кейбір қасиеттер бұрынғыдан бетер күшейіп, тіпті жаман жағына қарай өрши түскен. Соның салдарынан кейбір адамдар өзін Құдайға теңеп, арғы тегі бір кездері алып тіршілік иелерінің құлдары болғанын ұмытып кетті...».
Міне, адамдардың қалай пайда болғаны жөнінде кейбір ғалымдар жасаған ғылыми тұжырымның ұзын-ырғасы осындай. Әрине, адамды Құдай топырақтан жаратты деген сенім қалыптасқан мұсылман баласы мұндай тұжырыммен келіспесі анық. Дегенмен әр-әр жерден табылған алып адамдардың сүйектері расында да бір замандарда олардың тіршілік еткенін білдірсе керек. Алыптар туралы ата-бабаларымыздан қалған аңыз-әңгімелер де бекер емес шығар.
[1]:
