Жамиғ Ат-Тауарих – Қадырғали Жалайыри еңбегінің атауы. Бұл 17 ғасырда жазылған шежіре. Оны кезінде 1825 Қазан университетінің қызыметкері Ибрагим Халифінен И.Н.Березин (1854) алып Қазанда бастырған. Бұл басылыммен Ш.Ш.Уәлиханов, көптеген татар, қазақ ғалымдары таныс болған. Шежіре қазақ тілінде алғаш 1989, содан кейін 1991, 1997 ж. жарық көрді. Жазбаның бас жағы Борис Годунов патшаға мадақ, орта тұсы Рашид әд-Дин шежіресінің ықшам баяны, аяғы Орыс хан мен Оразмұхаммед аралығындағы оқиғаларды қамтыған Шыңғыс ұрпақтарының тарихы. Қадырғали Жалайыри шежіресі Рашид әдДин жазбасының көшірмесі емес. Көлемі шағын, бірақ тың тараулары бар жеке тарихи жазба. Ол Қазақстан, Орта Азия, Алтай, Моңғолия елдерінің тарихын зерттеуде тарихи дерек көздердің бірі ретінде қолданылып келеді.
