Сәлеметсіз бе, Назима!
Мен қазір "Болашақ" бағдарламасы бойынша Англияда оқып жатырмын. Осы орайда, сіздің сұрағыңызға жауап бере кетсем деймін.
1. Болашақ бағдарламасы арқылы Англияда оқу үшін әуелі университетті тәмамдап алуыңыз қажет. Өйткені, қазір "Болашақ" арқылы бакалавр оқуды алып тастаған. Тек ғана магистр, phD, стажировка өтуге болады.
2. Университетті аяқтаған соң "Болашақ" бағдарламасының 6 категориясы бойынша стипендияға тапсыра аласыз. Біріншісі, мемлекеттік қызметкерлер санаты. Екінші, педагог қызметкерлер санаты. Үшінші, ЖОО түлектері санаты. Төртінші, өз бетімен түскендер. Бесінші, мәдениет және шығармашылық қызметкерлері, Соңғысы, БАҚ қызметкері. Сіздегі болашақтағы мүмкіндік ЖОО түлегі ретінде немесе өз бетінше оқуға түсуші ретінде "Болашаққа" тапсыра аласыз. Қайталап айтайын, тек ғана магистр дәрежесінде білім алуға болады. Бакалавр жоқ "Болашақта".
3. "Болашаққа" құжат тапсырудың мынандай шарты бар:
ҚР ЖОО-ның ағымдағы жылғы түлегі болу;
Өтіл талап етілмейді;
Құжаттар тапсыру сәтінде өзі аяқтаған жоғары оқу орнының ғылыми немесе педагог қызметкері болу;
Бакалавр немесе маман дипломының қосымшасы бойынша орташа балы 5,00-ден 4,0 (4,00/4,33-тен 2,67 GPA) болуы қажет.
Сосын құжат жинайсыз. Керекті құжаттар тізімі:
- сауалнама;
- өтініш-негіздеме;
- жұмыс берушіден ұсынымхат;
- жеке куәлік пен паспортының түпнұсқалары және көшірмелері(түпнұсқалар салыстырылғаннан кейін үміткерге қайтарылады);
- дипломның нотариалды куәландырылған көшірмесі (қосымшасымен бакалаврдың немесе маманның);
- 0-82/у медициналық анықтамасы;
- еңбек қызметін растайтын құжаттардың нотариалды куәландырылған көшірмесі;
- мемлекеттік немесе орыс тілдеріне нотариалды куәландырылған аудармасы бар оқу бағдарламасын, мамандығын және кезеңін көрсете отырып, академиялық оқуға шартсыз тіркелгені туралы (қаржылық шарттарды қоспағанда) құжат;
- ол болған жағдайда, мемлекеттік тіл бойынша емтихан тапсыру туралы нақты ресми сертификаттың көшірмесі;
Құжаттарды орталыққа өткізгеннен кейін емтихан кезеңі басталады. Емтихан 5 кезеңнен тұрады.
I айналым. Шет тілін білу емтиханы
Шет тілі бойынша емтихан тапсыру туралы ресми сертификат болмаған жағдайда, үміткер тілдік емтиханға жіберіледі.
Өту балына талаптар:
IELTS: 9.0-ден 4.0
TOEFL: ITP/PBT – 677-ден 397
IBT – 120-дан 31
II айналым. Мемлекеттік тілді білу емтиханы — Қазтест
Мемлекеттік тіл бойынша емтихан тапсыру туралы ресми сертификат болмаған жағдайда, үміткер қазтестке жіберіледі.
III айналым. Үміткердің шетелде оқуға және тұруға психологиялық диагностикасына тестілеу – Психотест
Осы тесттің нәтижелері– Ұсынылған/Ұсынылмаған
IV айналым. Тәуелсіз сараптама комиссиясының (ТСК) мүшелерімен әңгімелесу
Әңгімелесу барысында Қазақстан Республикасының Конституциясын, Қазақстан тарихын, мемлекеттік рәсімдерін білуі, оқу мамандығын сезіммен таңдауы және үміткердің кәсіби даярлық деңгейі анықталады.
V айналым. Шетелде кадрлар даярлау жөніндегі республикалық комиссияның отырысы
Республикалық комиссия үміткерлер конкурсының барлық турларының нәтижесі негізінде «Болашақ» стипендиясын тағайындау туралы соңғы шешім шығарады.
Сонымен қатар, Республикалық комиссияның шешімінде «Болашақ» стипендиясы есебіненшетелдің жетекші жоғары оқу орындарының, шетелдік ұйымдардың талаптарына сәйкес үзіліссіз тілдік курстан өту қажеттігі көрсетіледі.
Сізге сәттілік тілеймін. Мен де мектепте оқып жүргенде шетелде білім алуды армандайтынмын.
