Ғаламшарлықтар Жерді мекен еткен бе?
Әлемде өзге ғаламшарлықтар жайлы оқиғалар көптеп кездеседі. Алайда оның шын-өтірігі ғылымда дәлелдене қойған жоқ. Бірақ әлемнің түкпір-түкпірінен табылып жатқан кейбір олжалар таңғалдырмай қоймайды.
Осы саланы зерттеп жүрген мамандардың пікіріне сенсек, өзге ғаламшарлықтарға жер әлем осыдан бірнеше ғасыр бұрын пана болған екен. Яғни кейбір ғалымдар «өзге ғаламшарлықтар адамзаттан жерді тартып алу үшін келеді» деп, «жауды жақындатып, атты тақымдатып», байбалам салып жатса, басқа зерттеушілер «олар жер шарын баяғыда-ақ мекен етіп кеткен» деген тұжырымды ұсынып жатыр...
Дропа тайпасы
Мұндай тұжырым сонау ХХ ғасырдың бас кезінде пайда болған екен. 1938 жылы Қытай археологы Чи Пу Тей өзінің шәкірттерімен Тибет тауларының үңгірлеріне зерттеу жүргізеді. Зерттеу барысында олар пішіні адамдыкіне ұқсамайтын қаңқаларды табады. Содан бас сүйектері әдеттегіден үлкен, ал денелері нәзік әрі жіңішке келген бұл қаңқалар өзге ғаламшарлықтарға тиесілі деген болжам жасайды. Олардың бұлай болжауына үңгір қабырғаларындағы күн мен айдың және аспан денелері салынған суреттерде негіз болса керек. Сондай-ақ ғалымдар сүйектердің жанынан не мақсатта қолданылғаны беймәлім, диаметрі 30 сантиметрге жететін, құрамы өзгеше дөңгелек тастарды табады. Осылардың барлығын ескере келе, ғалымдар бұл түсініксіз тіршілік иелері 12 мың жыл бұрын жер шарына ұшып келген «дропа тайпасы» болған деген тұжырым жасайды. Ал 60-жылдары Ресей және Америка басылымдарына Тибет тауларынан табылған «дропа тайпасы» жайлы деректер шыға бастайды. Алайда мұндай зерттеудің болған-болмағаны белгісіз. Осындай жәдігерлердің табылғандығын растайтын дәлелдердің болмауы осы оқиғаның болғандығына күмәнмен қараушылардың санын көбейткен. Күмәнданушылардың қатарын азайтуға талпынған Қытай ғалымы Цум Ум Нуй өзге ғаламшарлықтардың дөңгелекшелерінде таңбаланған иероглифтердің мағынасын ашады. Ол дөңгелектерде дропа тайпасы жайлы ақпараттың бар екенін, бұл тайпаның ғарыш кемесі жерге алыс планетадан ұшып келіп бұзылғанын, сол себепті де жерде қалып қойғанын жазады. Осындай негізсіз тұжырымдарымен ғылыми басылымдарға мақала жариялаған ғалым елдің сынына ұшырап, күлкіге қалады. Мұндайды көтере алмаған ғалым Жапонияға кетіп, сол жерде дүние салған екен. Қытайлықтар таратқан бұл оқиғаға өзге елдің ғалымдары ойдан шығарылған аңыз деп қарайды. Тіпті зерттеушілердің көбісі Цум Ум Нуй деген ғалымның болғандығына да күмән келтіреді. Десе де бұл аңыз көптеген елдердің қызығушылығын тудырған көрінеді. Тіпті Мәскеу ғалымдарының өзі Қытай елінен дөңгелек тастарды арнайы алдырып, зерттеу жүргізіп, олар да табылған бұл жәдігерлердің жерге тиесілі еместігін дәлелдеген-мыс. Ал Австралия ғалымы Эрнест Венегер 1974 жылы осы жайттың шын-өтірігін нақтылау үшін Қытайға келеді. Бұл сапарында ел мұражайын аралап жүріп, құпия тастарды көзі шалып қалады. «Өзге ғаламшарлық жәдігерлерге» қызыққан ол орайын тауып, суретке түсіріп алады. Бірақ бұл тастар көп ұзамай мұражайдан ізім-қайым жоғалып кетеді. Солайша ғалымның суреті дәлелсіз құжат күйінде қалып қояды.
Жұрттың күлкісіне, ғалымдардың сынына ұшыраған қытайлық зерттеуші Цум Ум Нуйдың тұжырымына Неміс археологы Вальтер фон Мольтке кәміл сенеді. Оның пайымдауынша, дропа тайпасының туған қонысы Сириус ғаламшарының жанында болуы мүмкін. Қытайлық ғалымның еңбектерін жоққа шығармайтын зерттеуші бұл тайпаның түгелімен қырылып қалғанына еш сенбейді. Ол Қытайдың адам аяғы баспаған тауларында әлі де болса дропа тайпасының өкілі тіршілік етіп жүр деген ойда.
Осылайша құпиясы көп, дәлелі жоқ бұл жайт көпшілік үшін аңыз деңгейінде қалып қоя бермек. Кім біледі, мүмкін, Қытай ғалымдары өзге ғаламшарлықтардың құпиясын бұрын ашу үшін немесе басқа да бір себептермен шындықты жасырып, ақиқатты аңызға айналдырғысы келген болар. Ақиқаты қайсы, өтірігі қайсы, анық білмеген соң бірдемені болжап білу мүмкін емес те шығар.
Мысырдан табылған мумия
Қытай жеріне өзге ғаламшарлықтар осыдан 12 мың жыл бұрын келіп қоныстанған болса, Орталық Африка жеріне осыдан 500 жыл бұрын ұшып келген екен. 2009 жылы швейцариялық антрополог Уго Дети бастаған зерттеу тобы Руанданың ну орманынан ежелгі тайпа мекен еткен қонысты табады. Зерттеу барысында ғалымдар түсініксіз 200-ге тарта қаңқаны табады. Қытай жерінен табылған сүйектердің биіктігі бір метрден аспайтын болса, орманнан табылған тіршілік иелерінің биіктігі 2 метрден асатын көрінеді. Бірақ сыртқы пішіндері бір-біріне ұқсас келген. Зерттеуші Уго Детидің сөзіне сенсек, олар жерге жіберілген өзге ғаламның жауынгерлері. Жерге қоныстанған олар өздеріне тапсырылған бұйрықты орындамай жатып, қырылып қалған. Олардың өліміне жердің тіршілік иелері емес, қандай да бір індет себеп болса керек. Зерттеу тобы бұл жауынгерлердің арасында аман қалғандары да бар болуы мүмкін деген ойда. Өйткені оларды жерге жеткізіп салған ғарыш кемесі әлі де табылмапты. Ғалымдар зерттеу жұмыстарының нақты қай маңда жүргізіліп жатқанын айтудан үзілді-кесілді бас тартқан. Олар дүниені дүр сілкіндірер жаңалықтарға қол жеткізбейінше, қарапайым халыққа бұл ескі қоныстың мекенжайын бергісі жоқ. Кім біледі, бұл да бір «атың шықпаса - жер өртенің» тәсілі шығар.
Мұндай тың жаңалықтарымен жер әлемді түрік ғалымдары да таңғалдыра алатын көрінеді. Сонау мұздық дәуіріне тиесілі өзге ғарыш иесінің қаңқасы түрік зерттеушілерінің қолына да түскен екен. Шыны табытқа салынып, бальзамдалған тіршілік иесінің бойы небары 1 метр 20 сантиметр. Ал денесінің түсі жасыл келген әрі қанаты бар-мыс. Адамға көбірек ұқсайтын бұл мумияның қанаты мен көздерінің үлкендігі, түсінің өзгешелігі түрік зерттеушілерінің санасын сан-саққа жүгіртуде.
Өзге ғаламшарлық «жәдігерлер» сонау ежелгі Мысыр жерінен де табылған екен. Ол маңайдан табылған мумияның бойының ұзындығы екі жарым метрді құраған. Бір қызығы, мысырлық ақсүйектердің ескі мазарынан табылған бұл қаңқа адамның сүйектеріне ұқсамайтын болып шыққан. Ғалымдардың есебінше, бұл қаңқаның жасы 4 мың жылға жетіп қалады. Яғни кезінде адамдармен қатар өмір сүрген бұл құпия тұлға өзге ғаламшарлық болуы әбден мүмкін. Оның аузының үлкендігі мен сөйлеу, есту, иіс сезу мүшелерінің мүлдем жоқтығы ғалымдарды сондай ойға жетелеп отыр. Сондай-ақ «ақсүйектің» жанынан тұрмысқа қажетті керек-жарақтары және өзге де, не сол заманның, не бүгінгі күннің сайманына ұқсамайтын заттар табылған. Мазардан, сонымен қатар дөңгелекшелер, тасқа қашалып салынған жұлдыз бен айдың суреттері, түрлі сызбалар табылған. Бір айта кетерлік мәселе, аталмыш мазар асқан шеберлікпен соғылған екен. Қабырғаларының беріктігі мен түзулігі сол кездегі мүмкіндіктің шектеусіз болғандығын айшықтай түссе керек. Демек, Мысыр пирамидаларының салынуына өзге ғаламшарлықтардың септескені шындыққа саятын секілді.
