Ал шындыққа жүгінсек қоғамда әйелден гөрі ер адамның құқығы аз қорғалған. Оны өмірдің әр саласынан көруге болады. Соған бір мысал. Егер мінез-құлық сәйкессіздігіне қарай ерлі-зайыптылар ажырасуға өтініш білдірсе біздің елдегі сот орындары әрқашан да әйелдерді жақтап балаларды солардың иелігінде қалдырады. Ал ерлер балаларына кәмелет жасына дейін алимент төлеу жазасына кесіледі. Рас кінә тек бір жақтан ғана болмауы да мүмкін. Десе де, сот шешімінің көп жағдайда әйел пайдасына шешілетіндігі жасырын емес. Сосын тағы да мына бір жәйтке тоқтала кеткен жөн сияқты. Басқаның бәрін ысырып былай қойғанның өзінде, ғұмыр ұзақтығы жағынан әйелдер ерлерден 12-15 жыл артық өмір сүреді. Статистикалық деректерге жүгінсек, Қазақстандағы ерлердің өмір сүру мерзімінің орташа көрсеткіші 61 жас болса, әйелдер 72-73 жас жасайды екен. Ең миға қонбайтыны, ғұмыр сүру ұзақтығы жөнінен айырмашылық көзге ұрып тұрғанына қарамастан, біздің елде әйелдер зейнеткерлікке 5 жыл бұрын шығады. Ал, ерлер өліп-талып жеткен зейнетақысын бар болғаны 2-3 жыл ғана алып, одан кейін о дүниеге сапар шегеді. Мұны әділеттілік деуге бола ма?
