Айттан 1 күн бұрын.
Шек (немесе шек шалу) дәстүр бойынша қайтыс болған жақындардың рухына бағышталып,
Ораза айт немесе Құрбан айт мейрамдарының қарсаңында(айттан бір күн бұрын) беріледі. Бұл күндері мал сойылып, туған-туыс, көршілер шақырылып, Құран бағышталады.
Шек беру деп те айтады!
Қазақтар құрбан айттан бір күн бұрын отбасынан қайтыс болған адамға арнап "шек" береді, әрі мұны үш жыл жалғастырады. Одан соң "өз атымыздан құрбан шалуға құқықты боламыз" деп қарайды. "Құран кәрімде", пайғамбарлардың "Қадистерінде" мұндай әдет жоқ. Шындығына келсек, "шек" беру ежелгі замандардағы құрбандықтың қазақтарға тән болған бір түрі есептеледі. Ол исламнан байырғы "тәңір" аталатын діннен өтіп, зороастр дінінен өтіп, одан жоғалмай бүгінгі дәуірге жетті. Яғни, ата-баба әруағына құдайы тамақ, тасаттық берумен қатысты, халқымыздың ислам дінін өздерінің байырғы діні мен салт-дәстүріне ыңғайлап қабылдағанымызды ұмытпағанымыз абзал. Жалғыз қазақ халқы ғана емес, әлемдегі көптеген мұсылманданған ұлттар осылай істеген. Сондықтан да ислам діні өте көп мәзһаптарға бөлініп кетті. Қазақтар ислам дініне сенумен бірге өздерінің ата-баба әруағына табына жүруді ұмытпағанын осыдан байқаймыз. Олар ислам дінінің "Алласынан" қорқумен бірге, ата-бабасының әруағынан да секем алып, құрбан айттан бұрын олардың шек-шекарасын ажыратып тастауға тырысқан. Сонымен бірге бұл шек беруді - бақилық болған адамның тіршілігінде шала алмай кеткен құрбандығы деп түсіндіруді әдетке айналдырған.
"Қазақ ұлты сенген діндер" кітабынан, авторы Амантай Нысанбекұлы.
