Жүрегімде қалды елесің, сені ұмыта алар емеспін…© бұл да бәр әйгілі әннен үзінді. Кейде, сүйгеніңе еш қатысы жоқ, көңілсіз махаббат туралы өлеңдерден өзіңдікіне ұқсас сезім, ұқсас жағдайды естіп не көріп қалып, тамағыңды бір өксік тағы жұлмалайды. Ол азаптан құтылу үшін жылаңқы әндерді, жабырқау туындыларды әдейі іздеп тыңдаудан, оқудан мүлде бас тартуың керек. Махаббат тақырыбындағы мұңлы әңгімелерді де, киноларды қарауды да доғаруың керек. Әлемнің оның ішінде қазақтың шоу-бизнесі мен бульварлық баспасы жауапсыз махаббат сезімі арқасында қыруар ақша тауып отырғандықтан, оларға сенің жалғыздық сезімінен, мұңнан айығуың еш тиімді емес. Иә, бұл бизнес, бауырым. Қасақана емес. Мейрамбек Беспаев, Қайрат Нұртас, Орда және т.б сияқты ондаған, жүздеген, мыңдаған әншілер мен топтар, үнді мелодрамалары, кітаптар, Түрік, Корей сериалдары өзіңе мүлде мұқтаж емес адамдар туралы ойларға әуре боп, жауапсыз махаббаттан құса боп, сағың сынған жерде жата берсең, сүйгенің түбі сендік болатынын, және осының бәрі ер жігітке лайық іс екенін құдайдың құтты күні миыңа әдемілеп құйып беріп отырады. Алайда шын өмірде бір де бір қыз үнемі мұңайып, мәселені ушықтырып, қиындатып жүретін драмақұмар жігіттер түрін жақтырмайды. Тіпті кейбірі олардан мейілінше аулақ жүруге тырысады. Қалай болғанда, айтылған жайт енді саған жан жақтан сенің бір басыңа төгілген «жауапсыз махаббат пен өкініштің» ауқымды жарнамасына төтеп беруге көмектеседі деген үміттемін.
