Қазақ халқы аттың тұрмандарын әшекейлеуге көп көңіл бөлген. Ол үшін алтын, күміс сияқты қымбат металдарды пайдаланған. Мысалы, ердің қасына, тоқым-тебінгілерінің бетіне, үзеңгіге, басқа тұрмандардың өн бойына лайықты көркем өрнектер салып, қымбат тастармен әдемілей түскен. Ондай тұрмандардың түгел бір комплексін жасағаны үшін шеберге жылқы, түйе сияқты ірі қаралардың бірін ақыға төлеген. Әлділерге жағынғысы келген кей шеберлер олардың ұл-қызына әдемі ер-тоқым жасап апарып, сыйына үйірлеп мал айдап қайтатын кездері де болған.
