Көптің көкейінде жүрген сұрақ... Химияның негіздерін әрбір адам білуі керек деп ойлаймын. Себебі, адамзатының өмірі химиямен тікелей байланысты.
Біріншіден, адам организмі. Адам организмінде химиялық элементтердің атқаратын қызметі өте жоғары. Мысалы, адам сүйегінің құрамында кальцийдің белгілі бір мөлшері бар. Егер сүйек құрамындағы кальций мөлшері азайып қалса, онда сүйектер жұмсарып кетеді. Ал адам денесін ұстап тұрған сүйек екенін барлығымыз да білеміз. Сондықтан организмдегі элементтер мөлшерін бір қалыпта ұстап отыру қажет. Мұны химиялық білімі бар адам жақсы біледі.
Екіншіден, медицина. Дәрі-дәрмектердің барлығы - химиялық қосылыстар. Дәрі-дәрмектерді химик жасайды.
Үшіншіден, күнделікті өмірде қолданып жүрген заттар сабын, сода, сусабын, ыдыс жууға арналған заттар. Мұның барлығын да химиялық қосылыстардан тұрады.
Төртіншіден, тамақ өнеркәсібіндегі, ауыл шаруашылығындағы, құрылыста (шыны терезелер, бояулар, цемент, әк т.б.), техника өнеркәсібіндегі таңғажайыптар химияның арқасында.
Сонымен қатар, жаңбыр, қар, атмосфера, биосфера, гидросфера, литосфера қабаттарында да химиялық қосылыстар, химиялық құбылыстар.
Міне, осының барлығы химиялық элементтерден, химиялық қосылыстардан, химиялық құбылыстардан тұратындықтан химия пәні оқытылады. Әрбір адам не жеп, не ішіп, не киіп, не қолданып жүргенін, сол заттардың денсаулығына пайдасы мен зиянын білуі керек. Сол үшін химия пәні оқытылады.
Мектептегі химия пәні химия ғылымының кішігірім кіріспесі. Ғылым мен техниканы дамытуда химия, физика, биология және математика ғылымдарының алатын орны ерекше.
Егер, оқушы химия пәнінің не үшін оқытылатынын, химиялық білім не үшін керек екенін білмесе, ол химия пәні мұғалімінің өз ісіне салғырттығы деп ойлаймын. Себебі, мұғалім тек атом мен молекуланы, элементтерді ғана айтпай, олардың өмірмен байланысын, өмірде сол білімді қай жерде, қалай қолдануға болатындығын түсіндіруі керек.
