Адам баласы жалпы тағдырды толық әрі дәл түсіне алмайды. Өйткені тағдыр тақырыбы өте қиын әрі күрделі мәселе. Сондықтан әрбір адам тағдырға байланысты мәселелерді дін мамандарынан сұрап, осы тақырыпқа байланысты жазылған кітаптарды оқып түсіне алғанынша түсініп, ал түсінбей ақыл жеткізе алмаған мәселелерін Аллаһтың шексіз ілімі мен әділдігіне тапсырып, адамдармен бос дау-дамайға кірмегені жөн.
Адамға байланысты тағдырдың екі жағы бар: 1. Адамның еркінен тыс жағы, яғни адамның еркінен тыс Аллаһ Тағаланың қалауы. 2. Адамның қалауына байланысты жағы. 1-шісіне адамның ұлты, туылған жылы, жынысы, денінің сау яки ауру болып дүниеге келуі, бойының ұзын немесе қысқа болуы т.б жатады. Ал 2-шісіне ниетіміз, әр түрлі іс-әрекеттеріміз(күнә, сауап) т.б жатады.Яғни, біз күнә немесе ізгі іс істеуге мәжбүрленбейміз. Өйткені, бізде таңдау еркі бар.
Аллаһ Тағала біздің не істейтінімізді біледі. Бірақ, ол бізді сол істі істеуге мәжбүр етпейді. Мысалы, біз күннің шығу сағатын астрономия ғылымы арқылы алдын ала біліп, күнтізбеге жазып қоямыз. Уақыты жеткен мезетте күн шығады. Ал енді осы күннің шығуы біздің алдын ала есептеп білгеніміз үшін жүзеге асты ма? Жоқ, әлде сол уақытта шығатын болғаны үшін біз білеміз бе?
