Тарихта, негізінен, шайдың отаны – Қытай деп есептеледі. Мәліметтерде, аспанасты елінде бұл өсімдік, алғашында (елді Хаң әулеті басқарған уақытта, шамамен б.з.д – 206-220 ж.а.) дәрі есебінде, ал, кейін (Таң әулеті билік құрған тұста, шамамен 618-907 ж.а.), оның қайнатпасы сусын ретінде пайдаланыла бастады делінеді.
Ал, аталған сусынды адамзаттың қытайдан басқа бөлігі қай кезде пайдалана бастады деген сұраққа біркелкі жауап беру қиын болатын шығар. Әр ұлт пен ұлысқа әр кезде, әр қилы жолмен жеткен бұл сусын. Мәселенки, қытай тілінің оңтүстік диалектінде шай «те» деп аталса, солтүстік диалектте «ча» деп аталады. Осыдан-ақ, әр ұлт тіліндегі шай сөзінің дыбысталуынан ол ұлысқа шайдың қытайдың қай бөлігінен жол тартқанын бажайлауға болатындай.
