Алғаш рет «гендер» ұғымын ғылыми айналымға 1968 жылы американдық психолог Роберт Столлер енгізген. Гендерлік көзқарас әйелдер мен ерлер арасындағы биологиялық ерекшеліктер емес, осы ерекшеліктерге мәдени және әлеуметтік мән беретін айырмашылық идеясына негізделген. Гендерлік ұғым белгіленген әлеуметтік ұйғарымдарды орындау, яғни кейбіреулер ойлағандай жынысқа қарсы емес, оған сай әрекет жасау ретінде түсініледі! Жыныстар арасындағы теңдік жан-жағынан бірдей болу керек дегенді білдірмейді. Бұл жерде әйелдер мен еркектердің бірдей құқығы мен мүмкіндіктері идеясын қолдау қиын. Нақты теңдік дегеніміз – қандай да болмасын бір жыныстың мүддесіне заң мен нормаларды бейімдеу емес, еркектер мен әйелдердің өзіне тән табиғи айырмашылығын ескеру. Еліміздегі 130-дан астам ұлт пен ұлыстардың достығы мен татулығын жыр қылып жатқанымызда, қазақтың әйелдері мен ерлері арасына сына қағып жатқандарға не дерсің? Әйелдер үстемдік құру үшін өз басымдықтарын жан-жақтыландыруға талпынады. Феминизмнің өзі кең мағынада қоғамның барлық салаларында әйелдердің ерлермен теңесуге талпынуы, әйткенмен де бұл әйелдердің ерлермен биологиялық теңдігін емес, құқылық теңдігінің көрсеткіштері болуы қажет.зиялы қауымды толғандыратын өзекті мәселенің бірі - қыз балалар мен әйелдердің шет елдерге көзсіз еліктеп күрес, бокс, штанга сияқты спорт түрлерімен айналыса бастауы болып отыр. Осы да гендерлік теңдік пе, бұл дегенің феминизмнің нағыз өзі емес пе?
*Үсті-басы көк ала, құлағы жапырайған, бет әлпеті быт-шыт, кескен томардай, нәзіктіктен жұрдай, боксшы, күрескер, штангашы қыздардан қандай жар, қандай ана шығады? Идеологиялық заңдылықтарға қарсы шығып әйел адамның болмысына тән емес іс-әрекеттермен айналысуы оларды әйелдік қасиетінен және табиғи нәзіктігінен айырып, еркекшора қылып жібермей ме? Біз әйелдер «төбелесінен» дүние жүзінде орын алмай-ақ қояйық, неден болса да бірінші болу біздің маңдайымызға жазылмаған шығар. Есесіне қыздарымыз сұлулығы мен сымбаттылығын, нәзіктігін жоғалтпасын.*
