Мынаны қараңыз: бір тал темекі тартқан адамның бүйрегіндегі бездерден адреналин және норадреналин деп аталатын гормондардың бұзылуы басталады. Асқазанның қышқыл сұйықтығы (запыран) артады. Адамның тыныс алуы тездейді. Жүрек соғу жиілеп, оның қалыптан артық жұмыс істеуіне алып келеді. Қан қысымы артады. Міне, мұның бәрі бір тал темекідегі никотиннің әсерінен болған жайттар. Мұның соңы адамды аса қауіпті асқынған ауруға душар етуі әбден мүмкін. Шылымқорлар сонымен қатар шетінен ұмытшақ болады. Олардың күш-қуаты азайып, шаршауы көбейеді. Әлсізденеді. Әрекет етуге құлықсызданады. Тәбеті тартпайды. Ұйқысы қашады. Жұмыс бабында, әсіресе қыста шылым шегу үшін сыртқа шығуды талап етеді, денсаулықтың нашарлауы, таңғы жөтел мазаңды қашыра бастайды. Осы сияқты бірнеше әсерлерден темекіні тастауға тура келеді. Осындай әрекеттерге шылымқор адамның барлығы бірдей келісе бермейді. Өйткені темекіге үйреніп қалған ағзаның оған деген құмарлығын тастау мүмкін емес деп ойлайды.
Ал дәрігер мамандар темекіні тастау, никотинге деген құмарлық алкоголь мен наркотикке қарағанда әлдеқайда жеңіл екендігін айтады. Тіпті бүгінде темекіні тастауға арналған медициналық көптеген препараттар шығарыла бастады, солардың ішінде тартрат варениклина (varenіclіne tartrate) препараты темекіге тәуелділіктен тез айығуға көмектеседі. Құмарлық ұстаған кезде ауызға сала қоятын сағыздар да бар. Дегенмен мұның ешқайсысы да адамның өз рухына сеніп әрекет етуіне жетпейді. Сондықтан егер зиянды түтіннен құтылуды ойласаңыз, онсыз да тәуелді ағзаны дәріге үйреткенше, алдымен ерік-жігеріңізді жанып көріңіз.
