Адам баласының артынан ұрпақ қалдырып, өзінің мұрагері ететін перзенттерінің дүниеге келуі ер мен әйелдің арасындағы жыныстық қатынастың себебінен биологиялық жолмен болады.
Адамзаттың жүктілік мерзімі қырық аптаны, яғни, тоғыз айды құрайды. Әрбір аптада ішке біткен ұрықтың бойында түрліше өзгерістер болып отырады. Жүктіліктің нақты диагнозы дәрігердің көмегімен анықталады. Одан басқа жүктіліктің алғашқы кездегі белгілері де бар.
Медицинада жүктіліктің нақты мерзімін анықтаудың маңыздылығы зор. Және ол мерзімдегі уақыттар аптамен есептеледі. Әр бір апта сайын жатырдағы ұрықтың даму кезеңдерін шамалап білуге болады. Ол үшін арнайы техникалық жабдықтардың қажеті жоқ. Қалыпты жағдайдағы жүктілік 38–42 аптаның көлемінде болады. Демек, 280 күннің шамасындай уақытқа дейін созылады. Жүктілік ұзақтығы соңғы етеккірдің алғашқы күнінен бастап саналады.
Перенетальды диагностика бірнеше кезеңдерден тұрады.
Эмбриональды кезең. Бұл кезең 10-шы және 13-ші аптаның аралығында аяқталады. УЗИ және биохимиялық маркер арқылы іштегі ұрықтың бойында Даун синдромы мен Эдвардс синдромының қаупі бар-жоқтығы анықталады.
16-шы және 18-ші аптаның аралығындағы кезең үш реттік биохимиялық маркер арқылы Даун синдромы, Эдвардс синдромы мен жүйке түтікшелеріндегі ақаулардың бар-жоқтығын анықтауға ең оңтайлы кезең болып табылады. Үш реттік биохимиялық маркер арқылы тексеру он төртінші аптадан бастап жиырмасыншы аптаға дейін жалғасады.
18-ші аптада іштегі ұрықтың қозғалысы байқалады. Егер алғаш рет жүкті болған әйел болса, онда 20-шы аптада іштегі ұрықтың қозғалысы байқалады. Оың қозғалысын дене бітімі арықтау келген әйелдер толық әйелдерге қарағанда ертерек сезеді.
20-шы және 24-ші аптада ұрықтың дене мүшелерінің жағдайын анықтайтын УЗИ тексеруі болады.
26-шы аптада қандағы қант диабетінің қаупі бар-жоқтығын анықтайтын (глюкозаны тексеретін) тест болады. Бұл тесті О’Салливан тесті деп те атайды.
30-шы және 34-ші апта аралығында іштегі ұрықтың жағдайын мен бала жолдасының (қағанақ, шу ) жағдайын анықтайтын үшінші реттік УЗИ тексеруі жүргізіледі.
38 аптадан асқан жүктілік жетілген болып табылады. Қалыпты жағдайдағы босану 40-шы аптада болады деп айтылғанымен, көбінесе, бұл уақыттан екі аптаға дейін бұрынырақ немесе кешірек босанатын жағдайлар болып жатады.
Қырық екі аптадан асқан жүктілік ұзақ уақытқа созылған жүктілік болып саналады.
Жүктіліктің белгілері
Нақты емес белгілері:
Жүректің айнуы, таңертеңгі уақытта лоқсу, асқа деген тәбеттің өзгеруі мен иіс сезу түйсіктерінің өзгеруі;
Жүйке жүйесіндегі өзгерістер: ашушаңдық, қызбалық немесе ұйқышылдық;
Бет терісінің пигменттерінің жоғарлауы, емізіктің өзгеруі;
Жиі зәр (кіші дәрет) жіберіп қою;
Қарын көлемінің ұлғаюы.
Нақты белгілері (дәрігерлік тексеруде белгілі болатыны):
Аменорея;
Сүт бездерінің ұлғаюы, уыздың пайда болуы;
Жатырдың пішіні, көлемі және консистенциясының өзгеруі;
5-6-шы аптадан бастап жатырдың үлкеюі.
