Келешек өрен жүрегі – ел ертеңінің тірегі
Еуразияның кіндік тұсында ұлан-байтақ жеріміз бар қазақ даласының келбеті бағзы бір ежелгі атам замандардан өзінің ұлы рухын жоғалтпай, күні бүгінгі үшінші мыңжылдықта да асқақтығын танытып отыр. Атыраудан Алтайға дейін созылған ұлан-ғайыр атырап, тарихы шексіз, дәстүрі шетсіз ата-жұрт. Әні мен күйі шалқыған, сыры мен жыры толқыған ғажайып сұлу сахара! Ел басына күн туған сәтте сиқырлы сөз құдіретімен алмастай тіліп тастайтын сөз шеберлері және санаулы сөзге салмақты ой сыйдырған, тереңнен толғайтын би-шешендер шыққан еліміздің киелі қара топырағы, мөлдір таза сарқылмас қайнар бұлағы, қазақи тамаша табиғат – осының барлығы дерлік бүгінгі таңда белсенді азаматтық ұстанымы қалыптасқан қазақ жастары, яғни біздің қолымызда. Сол себепті қолымыздағы нәр боларлық осы құнды қазыналарды көзіміздің қарашығындай сақтай отыра, оны одан әрі көркейтіп, келесі жас ұрпақтың жүрегіне тереңінен сусындату – біздің басты міндетіміз.
Тәуелсіздік! Қасиетті де құдіретті осы бір ұғымның тереңіне зер салып, ой жіберейін. Бұл тәтті сөздің тұңғиығында саналы пікір, арналы ой иесі болған ата-бабамның ғасырлар бойындағы асыл арманы, азаттық жолында құрбан болған талай-талай боздақтардың ұрпаққа қалдырған мәңгі өшпес аманаты, ұлан даланың жас перзенті – кеңпейіл қазақтың азаттық мұратындағы сан түрлі күрестері және тағдыр талайы жазған “тар жол, тайғақ кешу” іздері жатыр. Жаңа ғасырмен бірге келген ел тәуелсіздігінің жиырма жылдығы – азаттық ұранын ұрпағына ұлағаттаған бабалар үрдісінің жалғасы.
Отар болдым, от кештім, суға баттым,
Күнін кештім шарқ ұрған шағаланың.
Енді бүгін көрдім мен қазағымның
Азаттықты бақытқа балағанын! -
деп, дүние құндылығы бостандықта екені өрнектелген оралымды ойын салмақты сөзбен ашық білідіретін Бауыржан Жақып та жырлап өтіпті сол бір жылдарда.
Иә, сүйікті Отанына, атамекеніне деген сүйіспеншілік алауы мен перзенттік сезімі нағыз батырды қан майданға, жер қорғауға аттандырар болса, нағыз ақынды жырлататын да – осы күш. Қай халықта болмасын, өзінің кіндік қаны тамып, туып-өскен жеріне деген ыстық ықыласын, терең сезімдерін өлеңге қосып, өз өлкесінің тау-тасын, аққулы көлін жырламаған ақын кемде-кем. Көңілі дархан, ақпейілді қазақ халқы – тумысынан сағы сынып көрмеген батыр халық, тілдің майын ағызған дана халық. Туған жерді осылайша «білектің күшімен, найзаның ұшымен» «ереулі атқа ер салып, егеулі найза қолға алып, еңку-еңку жер шалып...» қорғаған батыл бабаларымыздың ерлігі мен жалынды ақын ағаларымыздың талантына бас иіп, тағзым етемін!
Еркіндік аңсаған халық тілегі бүгінгі таңда күнмен күліп, арайлап атқан ақ таңның нұр шапағын шашып тұр. Бостандықтың жиырма жылында жүз жылдарға татитын қадамдар жасалуда. Конституциямыз дүниеге келіп, елдіктің нышандары айқындалды. Тәуелсіздігіміздің айғағындай, елдігіміздің белгісіндей, алтын күндей Елтаңбамызды, әр алуан мемлекеттердегі олимпиадаларда желбіреген көк байрағымызды көргенде, әуелеген әнұранымызды естігенде бойыңды ерекше бір асқақ азаматтық сезім баурайды. Американдықтар Дж. Вашингтонын, орыстар І Петрді, түріктер Ататүрікті пір тұтып, оларды өздерінің мемлекеттігінің негізін қалаушы, ел тағдырының ең бір қиын кезеңінде тізгін ұстап, ту көтерген тарихи тұлғасы ретінде құрметтейді. Ал біз үшін осындай текті де дара тұлға – Нұрсұлтан Әбішұлы Назарбаев. Ел басшысы жалынды жастарға үлкен үміт арқалатқандықтан, біз қазақтың дархан даласын, тілі дана, іші сара бабалар мұрасының айнасындай тәуелсіздікдің қуатты әлеуеті деген атқа сай болып қана қоймай, соның жолында құрбан болған жандардың сенімін ақтап өтуіміз керек. Сол себепті егеменді ел болып, іргемізді бүтіндеп отырған кезде ұзақ жылдар бойы отаршылдық тұзағына түскен ұлттық санамыз қайта жанданған жылдан бері еркіндіктің елеулі елесін сезіне алғандығымыз бір ғанибет емес пе?!
Еркіндіктің осы бір елесін кеше ғана болып өткен жазғы Лондон олимпиадасында жеті мәрте әнұранымыз шырқалған сәтте, он үш рет көк туымыз желбіреген уақытта көзімізге жас ала сезінген болатынбыз. Бүкіл әлем қазақ жұртының мықтылығын, қасиеттілігін танығанын патриоттық рухқа толы жүрегімізбен сезгеннің өзі неге татиды десеңізші?! Күллі дүниені дүр сілкінткен кезекті мылтықсыз майданда қазақ елі бұрын соңды болмаған толағай табысқа кенелді. Бұл біздің ең бір сәтті қиялдарымыздың өзіне келе бермейтін, ең бір тәтті түстеріміздің өзіне кіре қоймайтын керемет жетістіктерге жеткізген, кеудесін намыс кернеген саңлақтарымыздың арқасы. Олар – егемен еліміздің белсенді азаматтық ұстанымы бар бір туар перзенттері.
Сөйтіп, еліміздің іргетасы қайта қаланып, ұлтымыздың бесігін түзеу үшін ат жалында жанталаспен өткізген жиырма жыл да артта қалды. Төле би бабамыз айтқандай, тек қолға қонған бақыт құсын үркітіп алмай, жұмыла кірісіп, кеңесін шешіп, елдіктің тұғырына әрбір азамат құс болып қона білсе – ел болғанымыз сол. Қалың тарихымыз туралы арқалы ақын – Жұбан Молдағалиев ағамыздың өзі былай жазған:
Тарих ол – уақытқа ұқсас толмайтұғын,
Қадайды қасыңа әкеп шалғай туын,
Тарих ол – бір ғаламат алтын көпір,
Ұрпақты ұрпақтарға жалғайтұғын.
Сондықтан да, еркін елдің жас қырандары, ХХ ғасырдың басындағы зиялыларымыз таңдаған білім мен білік жолын басшылыққа алып, туған еліміздің тәуелсіздігін сақтауға, талай теперішке тозбаған ұлтымыздың асыл мұрасын, салт-дәстүрін, биік рухын қастерлеп, ұрпақтан-ұрпаққа жеткізуге парыздармыз. Бұл игі мақсат жолында халқымыздың “Алтау ала болса, ауыздағы кетеді, төртеу түгел болса, төбедегі келеді” деген дана мақалын әрдайым жадымызда ұстап, бірлікті, тұтастықты ту қылып көкке көтеруіміз керек. Тәуелсіздіктің құны мен қадірін азаматтық сана, патриоттық жүрекпен түсіне білгеніміз жөн. Сондықтан келешек жас өреннің «қазақ» деп соққан жүрегін еркін елдің ертеңгі кезінің бетке ұстар тірегі ретінде ескерсек, болашаққа нық басып, тереземіз тең болатыны еш бүкпесіз айдан анық.
Ежелден аңсаған еркіндіктің туы жоғары, елдігі берік, тілегі қабыл бола берсін демекпін!
Тұрархан Қымбат Павлодар қаласы
