Жарсуат ауылы — Атырау облысының Индер ауданындағы ауыл, ауылдық әкімшілік округі орталығы. Аудан орталық — Индер кентінен оңтүстікке қарай 38 км жерде, Жайық өзенінің оң жағалауында шөл белдемінде орналасқан. Тұрғыны 1,6 мың адам (1999). Іргесі 1930 жылдардың бас кезінде ауыл шаруашылығын ұжымдастыру кезінде қаланды. 1963 жылдан Жамбыл атындағы қаракөл қой кеңшарының орталығы болды. 1996 жылдан оның негізінде “Махамбет” акциондық қоғамы құрылды. Жарсуатта орта мектеп, клуб, кітапхана, дәрігерлік-амбулаторлық пункт бар. Тұрғындары көрші елді мекендермен автомобиль жолы арқылы қатынасады.[1][2]
