<p style="text-align: justify;">Көзіңді аш, оян, қазақ, көтер басты,<br />
Өткізбей қараңғыда бекер жасты.<br />
Жер кeттi, дін нашарлап, хал һарам боп,<br />
Қазағым, енді жату жарамас- ты.</p>
<p style="text-align: justify;"><strong><a href="https://surak.baribar.kz/?qa=blob&qa_blobid=6017273636358259858">Аудио нұсқасы жүктеп алу</a></strong></p>
<p style="text-align: justify;">Ахметбек Нұрсилла</p>
<p style="text-align: justify;"><strong>Дулатов Міржақып (Қазір тіріліп келсе осы сөзін тура осылай қайталар еді деп ойлаймын)</strong></p>
<p style="text-align: justify;">«Көзіңді аш, оян, қазақ, көтер басты,<br />
Өткізбей қараңғыда бекер жасты», -<br />
«Ем таба алмай дертіңе мен ертеден,<br />
Сол бір қайғың өзегімді өртеген.<br />
Тырп етпейсің бас көтеріп көрпеден,<br />
Еңсең неге түсті мұнша, елім-ай», -</p>
<p style="text-align: justify;">Алаштың арманы</p>
<p style="text-align: justify;">Міржақып анасынан екі жасында, әкесінен 12 жасында айырылып ағасы Асқардың қолында тәрбиеленеді. Ауылда туып, ауылда өскен, ауылда оқып, ауылда қызмет етіп, «ауыл мұғалімі» атанған зерделі жас ауыл тұрғындарының ауыр тұрмысын, теңдігі жоқ аянышты халін көріп, түңіледі, тебірене толқиды. Езілген еліне ес болуға, жоғын жоқтап, мұңын мұңдауға серт байлайды.<br />
Халық ісіне бар болмысымен бүтіндей беріліп, «Қалғанша жарты жаңқам мен сенікі, Пайдалан шаруаңа жараса, алаш» деп, бар дауысымен жар салады.</p>
<p style="text-align: justify;">Өз бетінше талпынып, білім жинап, орыс тілін жетік меңгерген Міржақып орыстың озық ойлы азаматтарының еңбектерімен танысуы арқасында замана тозаңын суырып, дүниені дүр сілкіндірер дауылды күндердің тақап келе жатқанын өзгелерден бұрын сезеді. Кең даласында алаңсыз өмір сүріп, мал бағып жатқан бейқам халқын:</p>
<p style="text-align: justify;">«Көзіңді аш, оян, қазақ, көтер басты,<br />
Өткізбей қараңғыда бекер жасты», -<br />
деп, жырымен жұлқылап оятып, оларды білімге, ел үшін пайдалы іс-әрекетке шақырады. Бүкіл халықтың еркіндікке жетуінің басты шарты – түнек болып торлаған қараңғылық ұйқысынан ояну, дүр сілкініп, надандықтан арылу деп білген ол: «Оян, қазақ!» деп ұрандаудан танған жоқ.</p>
<p style="text-align: justify;">Сондықтан да оның үні қалың ұйқыдағы қазағын құлағының түбінен «маса» болып, маза бермей ызыңдап оятуды мұрат тұтқан өзінен он екі жас үлкен рухани ағасы Ахмет Байтұрсынұлының үнімен қатар естіліп, қазақ даласын қатар шарлады. Сол егіз үн тарих мінбесінен қатар көрінген екі алыптың қашан соңғы демдері таусылғанша, тағдыр талқысымен екеуі екі жақта жүрсе де, қуғынға түсіп, қамауға алынса да үзілмей, қатар естіліп тұрды.</p>
<p style="text-align: justify;">Ерте оянып, ерте есейген өр мінезді Міржақып қашанда күрес шебінің алдында болды. Жалынды сөзімен де, тындырымды ісімен де, жеке басының жүріс-тұрысымен де ол өзінен кейінгі жастарға әсер етіп, оларды халық ісіне алаңсыз берілуге үндеді. Оның публицистикалық толғауларынан шағын өлеңдеріне дейін, «Бақытсыз Жамал» романынан газет-журналдардағы шағын мақаласына дейін халық мүддесіне арналды. Сонымен қатар ол жастарды тәрбиелеу жөнінде көп ойланып, көп еңбектенді, халықтың пайдалы әдет-ғұрпын сақтауға, елін, жерін сүйетін тәрбие беруге күш салды. Жазушылық, қоғамдық қызметке педагогтік міндетті қосарлап көтеруі де Міржақыптың халқын беріле сүйетіндігінің айғағы еді. Ел бейнетіне өгіз болып жегіліп, ертеңі үшін жанын қиған Жақаң:</p>
<p style="text-align: justify;">«Ем таба алмай дертіңе мен ертеден,<br />
Сол бір қайғың өзегімді өртеген.<br />
Тырп етпейсің бас көтеріп көрпеден,<br />
Еңсең неге түсті мұнша, елім-ай», -<br />
деп дүниеден арманда кетті.</p>
<p style="text-align: justify;"> </p>
<p style="text-align: justify;"><img alt="оян қазақ" src="https://surak.baribar.kz/?qa=blob&qa_blobid=4953871661175785638" style="width: 800px; height: 777px;" /></p>
<p style="text-align: justify;"><img alt="оян қазақ" src="https://surak.baribar.kz/?qa=blob&qa_blobid=10341918155650947371" style="width: 800px; height: 258px;" /></p>
