Мемлекет басшысы Нұрсұлтан Назарбаев Александр Винокуровқа Олимпиада ойындарының алтын медалін жеңіп алуына байланысты құттықтау жеделхатын жолдады. Бұл туралы akorda.kz хабарлады.
– Топтық веложарыстағы тамаша жеңісіңізбен құттықтаймын! Жолды жүріп өтіп, мықты қарсыластарыңызды басып озуға Сізге өзіңізге тән мақсаткерлік пен рухтың зор күші көмегін тигізді.
Олимпиаданың алғашқы күніндегі Сіздің айқын жеңісіңіз Қазақстанның даңқын әлемге паш етті және отандық велоспорттың жоғары деңгейде екенін тағы да көрсеті.
Сіз веложарысты зор қызығушылықпен және толқыныспен қадағалап, өзіңізге шын тілеулес болған барлық қазақстандықтарға және спорт жанкүйерлеріне тамаша тарту жасадыңыз.
Біздің құраманың бұл алғашқы алтыны ХХХ Олимпиялық ойындардағы бұдан кейінгі жарқын жеңістеріміздің бастауы болсын, – делінген жеделхатта. kaztrk.kz
