Бұл - өте дер кезінде ашылған және қызықты да қажетті сайт. Қазір сайттар да, блогтар да көп. Бірақ солардың бәрінде құлаш-құлаш мақалалар, авторлардың жазбалары беріледі және бір-біріне өте ұқсас. Олар тым ұзақ болғандықтан уақыттың тапшылығынан оқып үлгермейсің немесе уақытың болса да бір-бірінен аумайтын жазбаларды кейде оқығың келмейді. Ал "Сұрақ-жауап" сайтының формасы да, мазмұны да өзгеше. Керекті сұраққа жауап аласың, шаршамайсың. Кейбір сұрақтар сайтты форумға айналдырып жібереді дегенмен келіспеймін. Себебі кейбір сұрақтардың жауабы нақтылықты қажет етпейді. Адамның ақыл-кеңесіне жүгінуді талап етеді. Сондықтан кейбір ақыл-кеңес сұраған сұрақтарға теріс қараудың керегі жоқ. Жастар жағына сондай сұрақтар ұнайды деп ойлаймын. Бір жаман жері, аға буын аға-апалардың өмірлік тәжірибесі көп болғандықтан кейбір сұрақтарға сол кісілердің жауабы болса жақсы болар еді, бірақ біздің қазақтың үлкендерінің самарқаулығы (мүмкін жастармен жағаласпайыншы деген менталитет пе) қынжылтады. Тіпті мына жердегі Денсаулық санатының ішінде жауап беретін бір дәрігер отырса, тіптен жақсы, әрине. Дегенмен сол дәрігердің таза қазақ тілінде түсінікті әрі сауатты түрде жазатынына күмәнім бар. Сосын кейбір жауап беруші сайт оқырмандары жауапқа сілтеме (ссылка) көрсете салмай, соны ықшамдап, қазақшалап ұсынып отырса тамаша болар еді. Өйткені сіз көрсеткен ссылка ұзақ әрі оны кез келген адам таба алады ғой. Ал мына жерден нақты қысқа да нұсқа жауапты көргісі келеді бәрінің. Жалпы, админ жас болса да өте қажетті сайтты қолға алған. Мына жерде сайтқа қатысты өз ұсыныстарын айтып жатқандарға да алғыс айту керек. Өйткені олар шын мәнінде осы сайтты ұнатып, оның өркендеуіне шын жанашыр болып отырғандар деп ойлаймын. Алдағы уақытта бұдан да жақсы болады деп сенеміз.
