Question

Қайырлы күн. Есімім жасырын болсын. Әйел адаммын Аллаға шүкір 5 балам жолдасым бар. Басымнан өте көп жағдайлар өтті. 18 жасымда келін болып түстім. Сол күннен бастап арақ ішетін күйеуімді кінәлап соны түзеу үшін басымды тауға да тасқа да ұрдым. Ақыр соңында жеңіліп көндіккен сияқтымыз. Арасында шаршадым деп өзім де қосылып ішетін болдым. Ақша жетпейтін сол баяғы мен барлығына жауаптымын. Үлкенім студент тамағы квартирасы үйдегі балалар сабағы тамағы киім кешегі басымдағы миллиондаған кредиттер төленбей ол тұр. Жұмыстан декреттік демалысқа шыққан мен мәз. Кредит төлеуге шамам келмеген соң, тегін екі жыл істедім таза. Жолдасым арасында стройкада , арасында камаз айдап жүреді. Үй де кредитке алынған. Ауылды жерде тұрамыз. Енді өмірге деген құштарлық жоқ. Қарызым көп не істерімді білмеймін.....

Answer 1

Түнерген бұлттың артынан, міндетті түрде жарқырап күн шығары хақ. Өмірдің ащы сынағына төтеп бергендер, гүлдей жайнап бәрін басынан бастайды.

Енді ойланып қараңыз, ішкілік ішкеннен мәселеңіз шешіліп жатыр ма?!

Неге ішкілікке емес, Аллаға жақындауға тырыспаймыз?! Намаз, Құран оқуды қолға алыңыз. Дұға, салауат, зікір жасаңыз.
«Аллаһу та'ала былай деп бұйырды: Ей адам баласы, маған серік қоспай құлшылық етсең, істеген амалыңның сияпатын беремін. Дұға ету сенен, қабыл етіп, беру Менен.» (Табарани)

Аллаһу та'ала: «Дұғаларыңды қабыл етемін, қолдарыңды бос қайтармаймын» деп бұйырған. Демек, біздің тілеген дұғаларымыз босқа кетпейді. Кітаптарда былай делінеді: Дұғаның арқасында күнәлар кешіріледі немесе бір бәленің алды алынады немесе келген бәле кетеді немесе ақыретте мол сауапқа қауышылады. (Шира)

Демек, дұғаның арқасында күнәларымыз кешіріледі, келетін бір ауру, бәле-жала бар болса, қайтарылады, келген бәле немесе дертіміз болса, олар кетеді немесе мол сауапқа қауышады екенбіз. Хадис шәрифтерде былай делінген:

«Дұға еткен адам үш нәрседен құр қалмайды: Күнәсі кешіріледі немесе дұғасының қайырлы нәтижесін (сияпатын) көреді немесе ақыретте марапатқа ие болады.» (Дәйләми)