Туған жер, осы сөзді естігенде құлаққа жағымды, жүрекке жылы тиіп, бойыңды бір тәтті сезім билейді. «Туған жердей жер болмас, туған елдей ел болмас» демекші, қай жерде жүрмесін әр адамның туған жерге деген сағынышы бір бөлек.
Міне, 2 айлық қысқы демалысымыз аяқталып, ақпан айының 23-ші жұлдызында Қытай елінің Бейжің қаласына ұшып келдім. «Пәлен жерде пайда бар, өз еліңдей қайда бар» деген екен дана халқымыз. Қазіргі таңда экономикасы қарыштап, миллиардтаған халықты белгілі бір тәртіпке жұдырықтай жұмылдырып, оларды қамтамасыз ете алып отырған осы бір алпауыт елден керегімізді алып,iлiм-бiлiм жинап оны өз халқымыздың пайдасын арттыруға жұмсамақ ниетте жүрмін. Дегенмен шет мемелекттің аты шет мемлекет сондықтан да өз туған жеріңді сағынарың сөзсіз.
Қасиетті қазақ даласының қадірін сыртта жүріп сезінбеу әсте мүмкін емес. Оның ішінде кіндіқ қаным тамған, Қазақ елінің кіндігінен орын тепкен, қасиетіне дүйім жұрт қайран болған Ұлытаудың топырағын басып жүргенге не жетсін. Қазақ халқының ортақ тірлігі мен бірлігіне ту тіккен киелі Ұлытаудың жанға шипа саф ауасы мен тау суынан канып ішкен бір сәттің өзі құдды бір жаныңа жәннәт сыйлағандай әсерде қалдырады. Табиғаттың жазылмаған заңдарымен жеткен құбылыстың бірі-Туған жер бізге өз қасиетін берер болса, біз де яғни жас ұрпақ туған жерге деген шексіз махаббатымызды патриоттығымыз арқылы білдіре алуымыз шарт. Әдетте, туған жердің қадірін сыртта жүрген біледі. Жерлесіміз, Ұлытаудың тумасы Камал Смайылов ауылына деген сағынышын сыртта жүріп, «Ұлытауым, сенің қасыңда Гималай маған аласа, Ұлытау сен ғажапсың, Кавказдан да тамаша» деп білдірген екен. Жалғыз Камал Смайлов қана емес, Ұлытау талай жүйріктерді бәйгеге қосып, қаншама текті ұрпақты тәрбиелеген дала. Сондықтан да Ұлытауда бекер туған ұл болмауы шарт. Туған жердің қасиетін жырлап келіп, жырлап өтетін ұрпақ азаймасын!
Туған жерге деген сағынышымды қағаз бетіне түсіруіме себеп болып отырғаны мына жағдай. Бүгін күнделікті әдетім бойынша электронды пошталық адресімді ашып қарасам қазақ ұлтының ұлы мейрамы наурыз мерекесімен аудан әкімінің құттықтауы келіп тұр. Ұлытау ауданының әкімі Хамит Нұрланұлы Омаровтың қолы қойылған. Менің шет елде жүріп мынандай қуанышты көргенімде қуанғанымды көрсеңіздер. Ұлытаудағы өз үйіме бірден телефон соқтым. Аудан әкімінің құттықтауын және бағалы сыйлықтарды менің отбасыма ауданның жастармен жұмыс жасау орталығы арқылы жеткізіпті. Осындай іс шараны ұйымдастырған аудан әкімі Х.Омаровқа алғысым шексіз. Осы сәтті пайдалана отырып, аудан жұртышылығын наурыз мерекесімен және биылғы Ұлытау ауданының 75 жылдық мерекесімен шын жүректен құттықтаймын. Ауданымыздың биылғы 75 жылдық мерекесіне өз үлесімді жастар тарапынан қосуға уәде беремін.https://baq.kz/kk/news/regmedia/regmedia-54191
