Тұздар байқаусызда ұзақ жылдар бойы буынға жиналады. Адамдар бұны сезбейді де. Бірақ, уақыт өте келе буындар солқылдақ болып, ауырсынуды сезінеді. Ауа-райының өзгерген сайын буын ауырады. Адам жасы ұлғайған сайын ауру асқына береді.
«Буыныма немесе мойныма тұз жиналып қалыпты. Тұзды кетіруде емделіп жүрмін» деген әңгімені жиі естиміз. Ағзаға қалай тұз жиналады? Ол қандай тұз? Ас тұзының ағзаға тұрып қалған тұзбен байланысы бар ма? Бұл сауалдардың жауабын ревматолог-маманнан білген едік.
Гүлмира Жұманова, Қ. А. Яссауи атындағы ХҚТУ клиникасының ревматолог-дәрігері:
– Буынға, мойынға, тізеге, омыртқаға тұз жиналу деген медицинада қарапайым ғана тілмен айтылатын сөз. Бір сөзбен айтқанда ағзадағы бұл мүшелерге тұз жиналмайды. Және бұған ас тұзының ешқандай да қатысы жоқ.
Буындардың сырқырап ауырып, қимылдауда қиындықтардың болуы – буын немесе омыртқа араларының бір-біріне тақасуы немесе тарылуынан туындайды. Мәселен, тізе буынына тұз жиналғанды – остеоартроз деп атайды. Бұл ауруда буындардың шеміршегі ыдырап жойылып, сүйектердің беттері жалаңаштанады. Омыртқадағы тұз жиналуды — остехондроз дерті деп атайды.
Сол секілді мойын, көкірек остехондрозы деп көптеген түрге бөлінеді. Бұл аталған дерт көп жағдайда ағзада кальцийдің жетіспеушілігінен егде адамдарда пайда болатын ауру түрлері. Оның белгілері қимылдағанда ауырсынумен айқындалады. Яғни, адамның жүріп-тұруы қиындайды. Кеселдің күрделілігі емнің өте ұзақ жүретіндігінде. Тіптен, кейде адам бұл дертке шалдыққанда өмір бойы емделуі де мүмкін. Тұздың жиналуында науқасқа алдымен мануалды терапия тағайындалады, бұдан нәтиже шықпағанда дәрі-дәрмектердің көмегіне жүгінеді. Екі емдік терапия қоса жүргізілуіне де болады. Жастар арасында тұздың жиналуы – аутоиммунды аурулар деп аталады. Жастардың арасында омыртқада кездесетін бұл ауру қауіпті саналады.
Осыларды ескере келе, ер адамдар 40 жастан кейін, ал әйелдерде климакстың белгілері біліне бастағанда кальций препараттарын қабылдауды бастағаны жөн.
http://kazrabat.kz/aғzaғa-tұz-zhinalsa/
