ЕКІНШІ ӘЙЕЛ АЛУ - ҚОҒАМНЫҢ ЕМЕС, ӘР АДАМНЫҢ ЖЕКЕ ШАРУАСЫ
Құрметті сұрақ иесі, әрине, шынайы өмір үнемі бір қалыпта тұра бермейді. Әсіресе, адамдарды бір біріне тартып, бастарын біріктіретін "сезім" деген асыл қасиет те - өмірдің аумалы-төкпелі кезеңдеріне сай - өзгермелі болып тұрады. Соның бірі - ғашықтық сезім. Ол үшін адам баласын жазғыра алмаймыз. Себебі, "ғашық болудың" астарында табиғи инстинкт қана емес, сонымен бірге үлкен адамгершілік қасиеттер жатады. Яғни, "сүйе білу - өнер" деп тегін айтылмаған. Мінеки, Сіз көтерген "екінші әйел алу" мәселесі көбіне осындай жағдайларда туындайды. Бірақ, Сіз отбасылы болғандықтан, жауапкершілігіңізде өзіңіз өмірге келтірген ұл-қыздарыңыз болғандықтан, Сіздің "махаббат сезіміңіз" бен осыған дейін мойындалған, шындыққа айналған "әке жауапкершілігі" өзара қайшылыққа түседі. Енді таңдау еркі тек өзіңізге келіп тіреледі, себебі, Сіз орындауға тиісті "әке жауапкершілігінен" бәйбішеңіз де, ұл-қыздарыңыз да өз еркімен бас тарта қоюы екіталай. Осы бір алақұйын жағдайда Сіз толқулысыз, сол себептен, шешуші қадамға - яғни, "екінші әйел алуға" бел байламас бұрын "осы мәселеде қоғамның көзқарасы қандай еді?" деген сұрақты қойып отырсыз. Бұл сұрақты қойғаныңыз да жөн, себебі, нақты шешімге келген болсаңыз, Сіз осы қадамыңыз арқылы болашақта "екі отбасы" арасындағы болуы мүмкін қайшылықтың зардабын біршама жұмсарта аласыз... Ал, енді нақты жауапқа келйік: мұнда Сіз үшін "қоғам пікірі" емес, нақты ағайын - туыстарыңыздың, өзіңізді баласындай көріп кеткен ата-енеңіздің, інісіндей сыйлаған қайын аға-әкпелеріңіздің, өз бірінші жарыңыздың келісімі мен балаларыңыздың осы оқиғаға моралді-психологиялық дайындығы өте маңызды деп санаймын! Онымен қоса, болашақта бақытты болам десеңіз - екінші әйеліңіздің де туыстарының келісімін алдын ала алғаныңыз жөн! Үшіншіден, ол қызбен (келіншекпен) арадағы ғашықтық сезімдеріңіз қаншалықты тұрақты, сезім уақыт тезіне төтеп бере ала ма, екі әйелдің мінездері үйлесім таба ма деген сұрақтарды да ойлап қойыңыз... Ал Қоғам мұндай қадамды айыптайды, әрине. Себебі, қоғамның құрып отырған мемлекеті бар, ол сол мемлекет қабылдаған заңдармен жүруге тиіс. Олай болмаса, Қоғам өз іргетасы (өмір сүру формасы) - мемлекеттілігінің бейберекеттігіне ұшырайтын болады.. Сондықтан, мемлекетте "екінші әйел" заңы заңдастырылмаған. Қазір оның орынан "азаматтық неке" деп айтылады. Бірақ ондай некенің заңдық негізі болмағандықтан, "екінші әйел" үнемі де заңнан тысқары қала бермек.
Ал Сізге нақты қандай кеңес берер едім:
1. Сезіміңіздің қаншалықты тұрақты екеніне көз жеткізіңіз
2. Оған бек сенімді болған соң ғана - бірінші әйеліңізбен, оның толық келісімін ала отырып, жауапкершіліктеріңізден бас тартпайтындай, мойныңызға алатындай етіп - ажырасу процесін бастаңыз.
3. Екінші әйелді қолыңызға қондырыңыз.
Міне, осы шараларды іске атқара алсаңыз - Сіз нағыз еркексіз! Сонда екі әйеліңіз де мемлекеттің заңдық аясында қорғауында" болады. Құда да тыныш, құдағи да тыныш" деген осындайда айтылса керек.
Сізге құрметпен, философ ағаңыз Әбдірашит Бәкірұлы
(kala55
@mail.ru)
