пГрант иегерлері тізімі таяу күндері баспасөз беттерінде жарияланады
Кеше Астанада Білім және ғылым министрі А.Сәрінжіпов төрағалық ететін білім гранттарын тағайындау жөніндегі республикалық конкурстық комиссия жұмысын бастады. Оның құрамында мемлекеттік органдар қызметкерлері, Ұлттық кәсіпкерлер палатасының, Қазақстан Азаматтық альянсының, Ғылым және білім қызметкерлері кәсіподағының өкілдері, жоғары оқу орындарының ректорлары бар. Білім және ғылым министрлігінің баспасөз қызметі хабарлағандай, ведомство соңғы уақытта студенттік орта құру мен таңдау сапасын көтеру бағытында бірқатар жүйелі жұмыстарды жүргізуде. Комиссия бұл жолы да осы қағидатты ұстанады. Ол жоғары оқу орындарына студенттер қабылдау жөніндегі дайындық жұмыстарының қорытындысын шығарады. Отырыста 2015 жылға бөлінген 32 168 грант иегерлері анықталады. Оның 500-і жоғары оқу орындарының дайындық бөлімдеріне берілсе, 29 668-і 1 курсқа студенттер қабылдауға арналған. Соның ішінде күндізгі оқу бөлімі гранттарының саны – 29 168, сырттай үшін – 500. Білім гранттарын қабылдау құқығын конкурс жолымен анықталған 60 жоғары оқу орны жеңіп алды
Комиссия отырысында Білім және ғылым министрі Аслан Сәрінжіпов мемлекеттік тапсырыс құрылымы үстіміздегі жылы қайта қаралғанын атап өтті. «Мемлекеттің әлеуметтік-экономикалық дамуында стратегиялық басымдыққа, ең алдымен Елбасы жариялаған индустриялық-инновациялық даму бағытына көңіл бөлінеді. Сол сияқты агроөнеркәсіп кешенін дамыту мамандықтары ерекше назарға алынады. Осындай мемлекеттік тапсырыстар еңбек нарығында жоғары білікті кадрларды дайындау құрылымын тиімді қалыптастыруға әсер етеді», – деп атап өтті министр. Көрсетілген басымдықтар есебімен 12 600 грант – түлектерді техникалық және технологиялық, 6000-ға жуық грант – педагогикалық, 2 690 грант ауыл шаруашылығы және мал шаруашылығы мамандықтары бойынша оқытуға бөлінген. Жалпы, 2015 жылы білім гранттарын алуға 67 377 түлек үміткер болып отыр. Олардың 53 162-сі – қазақ, 14 215-і орыс мектептерін бітірген. Сол сияқты «Мәңгілік Ел жастары – индустрияға!» жобасы шеңберіндегі квотаны алу жолындағы бәсекеге 6457 мектеп бітіруші қатысады. Конкурсқа қатысушылар арасында «Алтын белгі» төсбелгісінің 2 116 иегері бар. Ал 2014 жылы мұндай түлектердің саны 1 732 болған еді. Бұлардан бөлек, үміткерлер арасында Назарбаев зияткерлік мектептерінің 1 255 түлегі (2014 ж. – 323), жалпы білім беретін пәндер бойынша халықаралық және республикалық олимпиадалардың 163 жеңімпазы (2014 ж. – 179), жалпы білім беретін пәндер халықаралық және республикалық ғылыми жарыстардың 930 жеңімпазы (2014 ж. – 921), республикалық және халықаралық спорт жарыстарының 816 жеңімпазы (2014 ж. – 891), Президенттік олимпиаданың 6 жеңімпазы (2014 ж. – 13) бар. Олардың бәрі білім беру грантын тағайындау кезінде басымдықтарға ие болады. Хабарламада конкурсқа қатысатындар арасында, сондай-ақ, 483 жетім баланың (2014 ж. – 426), I және II топтардағы 341 мүгедектің (2014 ж. – 356) бар екені айтылған. Сол сияқты соғысқа қатысушыларға теңестірілген жеңілдіктер мен кепілдіктер бойынша 20 абитуриент (2014 ж. – 5) конкурсқа түсіп отыр. Мұнымен қатар Қазақстан Республикасының азаматы болып табылмайтын қазақ ұлтының 1 190 өкіліне квота белгіленген. 2014 жылы оның саны 1 194 болған еді. Комиссия жұмысын аяқтағаннан кейін оның қорытындылары республикалық ресми басылымдарда жарияланады
Ақпарат көзі: http://egemen.kz/2015/08/06/72245
