«Шөл даланың ақ күні»
«Байқоңырдағы» ғарышкерлердің ұшар алдында міндетті түрде орындайтын тағы бір дәстүрі – кино көру. Кино болғанда да, ресейлік «Шөл даланың ақ күні» фильмі. Бұл дәстүр 1971 жылы ғарышкерлер Владислав Волков, Георгий Добровольский мен Виктор Пацаевтар қайғылы қазаға ұшырағаннан кейінгі көңілсіз кезеңде пайда болыпты. Осы сәтсіздіктен кейін басшылық ұшу бағдарламаларына тыйым салады.
Ал КСРО басшылығы араға екі жыл үзіліс салып барып тағы да ұшуға рұқсат береді. Сөйтіп, 1973 жылдың 27 қыркүйегінде Лазарев пен Макаров ғарышта екі күн болып, аман-сау Жерге оралады. Олар ұшардың алдында осы «Шөл даланың ақ күні» фильмін көреді. Содан бастап бүкіл ғарышкер міндетті түрде ұшар алдында осы фильмді көруді әдетке айналдырған.
