Қазақстандағы ең ұзын көпір Ертіс өзенінің үстінен салынып жатыр. Жалпы ұзындығы 12 шақырымнан асатын өткелдің құрылысына 15 мың тоннадан астам темір жұмсалып, 150 мың текше метр бетон құйылады. Жоба жетекшілер тапсыру мерзімін уақытылы орындаймыз деп жоспарлап отыр.
Қазіргі таңда жұмыстың отыз пайызы атқарылған. Мұнда тәулігіне 300 адам жұмыс істеуде. Мамандардың барлығы дерлік өзіміздікі. Яғни, Павлодар мен Қарағанды және Астанадан келген жұмысшылар.
Жобаның қажеттілігі орасан. Сан жолды тоғыстырған өткелдің үстімен тәулігіне 7 мыңнан астам көлік қатынайтын болады. «Орталық-Шығыс» бағыттың қос бөлігі төтесінен тартылып, «Астана-Павлодар» және «Павлодар-Өскемен» тас жолының арасы үш есеге қысқармақ. Қазір күре жолдың Елордаға бастайтын тұсында 200-ге жуық адам аянбай тер төгуде деп хабарлайды "Хабар" телеарнасы.
Көпір 2016-шы жылдың желтоқсанында қолданысқа берілуі тиіс. Халықаралық Экспо көрмесіне күнгейден келетін қонақтар легі осы жолмен қатынайды. Сапа үдесінен шығу үшін көрші елдің тәжірибелі мамандары ат салысуда.
