Медицина тілінде қан тазартуды – плазмаферез деп атайды. Плазмаферез – гректің «apheresis» – алып тастау, яғни, адам организмін плазмалардан (қанның, лимфаның сұйық бөлігі) арылту немесе тазарту деген мағынаны білдіреді. Ал адам ағзасындағы иммундық жиынтықтар, улы заттар (токсиндер) мен қарсы денелер (антитела), сондай-ақ, белгісіз аурулардың қоздырғыш ошақтарының барлығы осы плазмада шоғырланады. Аталмыш заттарды плазмамен бірге алып тастау арқылы адам бойындағы қан тазарады.
Үш және бес реткі тазартудан кейін улы заттар шығатын жасушааралық сұйықтар мен жасушалар-дың өздері де тазаратын болады. Әр процедурада адам бойындағы бес литр қанның шамамен 20 пайызы тазаланады.
Нәтижесінде қанның жабысқақтығы азаяды; ішкі органдардың жұмыс істеуі жақсарады; адамның ұйқысы түзеліп, ойлау, есте сақтау қабілеттері арта түседі; иммундық жүйенің қорғаныс белсенділігі артады.
Плазмаферез аллергиялық, аутоиммундық, сонымен қатар ауыр сырқаттан соң және тағы да басқа жағдайларда қолданылады. Плазмаферезге көрсеткішті дәрігер анықтайды.
Плазмаферез арқылы емдеу Өскемендегі бірінші қалалық аурухананың трансфузиология бөлімінде 1998 жылдан бастап қолға алынып, бүгінгі күнге дейін тұрғындарға жемісті қызмет көрсетіп келеді. Оның әр процедурасы бүгінгі күні 5070 (бес мың жетпіс) теңге. Процедура емдеу мекемесі мен емделушінің екеуара келісімшарт арқылы жүзеге асырылатын болады.
Осы уақытқа дейін ем алған адамдар тарапынан емдеуші дәрігерлердің қызметіне, қан тазартудан кейін денсаулықтарына шағымданғандар болған жоқ.
