Бұл суретті салуға Леонардоның 4 жыл уақыты кетті. Суретке зейін қойып қарасаңыз Мона Лизаның қасы жоқ екендігін байқайсыз. Осыған орай да Винчи перфекционист адам болған деген пікір бар. Дұрыс қас сала алмаған суретші оны өшіріп, қайта салуға мұршасы жетпеген көрінеді. Қандай болғанда сурет өте әдемі болып шықты.
Леонардо да Винчидің «Джокондасын» тағы бір зерттеушілер тобы нысанаға алды. Бұл жолғы зерттеуге суретте бейнеленген адамның көңіл-күйін анықтайтын компьютерлік бағдарлама қолданылған. New Scientist журналының сайтында мәлімденген зерттеу қорытындыларына қарағанда, суреттегі Мона Лиза 83 пайызға бақытты, 9 пайызға бірнәрсеге қатты өкінген, 6 пайызға үрейленіп, 2 пайызға ашуланған әйел бейнесінде көрінген.
Енді картинада бейнеленген әйелдің бүкіл әлемді тәнті еткен жұмбақ күлкісі жайына келетін болсақ, білгірлер бұл мәселенің соңғы нүктесі әлі қойылмағанын айтады. Жуырда The Daily Telegraph басылымы Зальцбургтегі нейрокогнитивті зерттеулер орталығының психология профессоры Флориан Хуцлердің Мона Лиза күлкісінің шындыққа жанасымды тағы бір құпия сырын ашқаны жайындағы жағымды жаңалықтың шетін қылтитты.
Профессордың айтуынша, Мона Лизаның еріндеріне зер сала қараған адам олардың мүлде бейтарап екенін байқайды. Бірақ, суреттегі әйелдің аузына тікелей назар салмай, бірден көздеріне қараған кезде оның жүзінен жеңіл күлкі табын аңғаруға болатын көрінеді. Тіпті, бет-әлпетінің өзге бөліктеріне қараған сәтте оның еріндері басқаша бір қырынан көрініп, езуіндегі әсем күлкі «жаңа» мағынаға ие болады. Сөйтсе, ұлы суретші картинадағы кескінге жұмсартып көрсететін сфумато техникасын қолдану арқылы оның көз қиықтары мен езуіндегі әсем құйылысты асқан дәлдікпен бейнелеп, нәтижесінде осындай ғаламат оптикалық қиялға қол жеткізіпті.
Мона Лизаның осынау жұмбақ күлкісі жайында бұдан басқа да біраз зерттеу еңбектер жазылды. Солардың ішінде ең соңғы құпияны ұсынған Палермодағы Вито Франко деген ғалымның айтуынша, бейнеленген кезде Джоконданың денсаулығы нашар, яғни, холестерині жоғары болған көрінеді.
Қарғыс туралы бірінші рет естіп отырмын...)))
