2016 жылдан бастап ұлттық бірыңғай тестілеуге өзгерістер енгізілуі мүмкін. Бұл туралы журналистерге берген сұхбатында ҚР Білім және ғылым вице-министрі Такир Балықбаев мәлім етті, деп хабарлайды BNews.kz тілшісі.
«ҰБТ биыл соңғы рет өтіп жатыр деген пікірлер айтылып жүр. Біз ұлттық бірыңғай тестілеуді 2015 жылы да өткіземіз деп жоспарлап отырмыз. Бірақ, бізде ҚР білім беру жүйесін дамыту мемлекеттік бағдарламасы бар, оған сәйкес, емтихандардың форматы 2015 жылдан бастап қарастырылады», - деді вице-министр.
Оның айтуынша, қазірде арнайы құрылған комиссия осы мәселені зерделеп жатыр.
«Бүгінде комиссия бұл мәселені қарастырып жатыр, шешім қабылданған кезде қосымша хабарлаймыз. Бірақ бұл өзгерістердің 2015 жылғы сынаққа қатысы болмайды. 2016 жылдан бастап ұлттық бірыңғай тестілеуге өзгерістер енгізілуі мүмкін», - дейді вице-министр
