Адалдық ердің ісі... Осы бір тылсымына тартар сиқыры бар сұлу сөзді сирек ауызға алады адамдар. Тіптен аузынан осындай сөз шықпаған адамдар да бар шығар... Қарап отырсаңыз мына қамшының сабымен ғана өлшенетін өмірде адамдар бір-бірінен жан дүниесімен ғана ерекшеленеді екен. Адалдылығымен жан-жағына шуақ шашып жүру де кез-келгенге қонбаған қасиет. Бұл қасиет әсіресе қарауындағы қызметкерлерге ақыл айтар, оларға тек қызметкер деп қана қарамай әр адамға қамқор болар басшыларда болса нұр үстіне нұр ғой...
Адалдылыққа кiшкене мысал
Бір жолы бір әйел сату үшін Әбу Ханифаға жібек киім әкеледі. Әбу Ханифа бағасын сұрады. Әйел оның жүз дирхам тұратынын айтты. Әбу Ханифаның «Жоқ, бұл одан қымбат тұрады» – дегенде, әлгі әйел: «Мені мазақтап тұрған жоқсыз ба?» – деді. «Жоқ, шындығы сол. Сенбесеңіз, біреуді шақырып бағасын сұраңыз», – деді. Әйел жөн білетін біреуді шақырып, матаның қанша тұратынын сұрап білді. Сөйтіп, өмірі ешкімнің аңғалдығын пайдаланбаған Әбу Ханифа матаны жүз емес бес жүз дирхамға сатып алады. Яғни кісі ақысын жеудің қандай үлкен күнә екенін білген Әбу Ханифаның бұл оқиғасы да бізге жан-жақты үлгі...
