Тістің маңызы туралы айтып жатудың өзі артық. Маржандай тізілген, күріштей аппақ сау тістер- денсаулықтың кепілі. Ал егер алда-жалда тісіміз ауыра қалса, тездетіп тіс дәрігеріне қаралуға асығамыз. Тіс дәрігерін ғылым тілінде "стоматолог" деп атайды. Стоматология- медицинаның үлкен бір саласы. Грекшеден аударғанда "ауыз қуысын зерттейтін ғылым" деген мағына береді. Әрине, стоматология барлық ғылым секілді күні кеше пайда болған жоқ. Тарихы әріден, сонау көне Мысыр, Грекия, Рим, Шығыс медицинасынан бастау алады. Тіпті, кейбір зерттеушілер алғашқы тіс дәрігері осыдан... 9мың жыл бұрын өмір сүрген деген пікірде. Осыдан біраз жыл бұрын археологтар Пәкістанның Белуджистан аймағында қазба жұмыстарын жүргізіп, біздің дәуірімізге дейінгі 5,5-7 мыңжылдықта ғұмыр кешкен ежелгі адамдардың қонысын табады. Сол жерден табылған жақсүйектерді мұқият зерттей келе, тістердегі 1-3 миллиметрлік ойықтарды байқайды. Ғалымдар бұл ойықтар тіске жасалған ем-домның нәтижесі деп есептейді.
