ЗАЛЫМ ТӨРЕГЕ
Тақсыр- тақсыр дегізіп тамсандырдың,
Сөйтіп жүріп аяққа қан салдырдың,
Жан жүрмейтін ісіме жан алғыздың,
Ақырында, малымнан көп қалғыздың.
Оразаның түбіне мақсым жетер,
Азған елдің түбіне тақсыр жетер.
Әділдіктен хан тайса, наным кетер,
Жылай- жылай жарлының малы кетер.
Ай, тақсыр, бұл дүние өтер, кетер,
Мал иесі де артыңнан қуып жетер.
Жарлылар да бір табар әділ қазы,
Таразалы күн болса, арыз етер!..
