Ұлынан тектілік, қызынан ептілік табылатын бұл қазақтың қашан да әйел затына деген сый-құрметі таусылмаған. Қыз баланы құрметтеу жағына келгенде қазаққа жетер халық жоқ шығар, сірә! «Қыз деген – ана, Ана деп қара» деп жүзі үлбіреген мақпалдай қыздарды бағалап, қай жерде болмасын төрге отырғызып мәпелеген. Аруларды жер бетінің бүкіл асылына айналдырған қазақ жігіттеріне еріксіз риза боласың. Бәлкім, олар жұмақ – ананың табанының астында екенін жақсы түсінетін шығар.
Мейлі, ол ептеп шашын қиса да, көнегөз істерді тыйса да, әлпетіне бар бояуды жыйса да – қазақтың қызы әдемі, қазақтың қызы керемет! Ибалы қыз, инабатты келінді де қазекем әкелген ғой мына өмірге. Әйтпесе, ата-ененің алдында иіліп, қайынжұрттың атын атамайтын келінді басқа қай жақтан көріп едік?! Ақ орамалдың түсіндей пәктік пен судың мөлдірлігіндей тазалықты жанына серік еткен арайлы қызды біздің халық әлемнің асылына балайды емес пе?
