Гол соққыш қақпашылар
Футболда қақпа күзетшілерінің де гол соғып, командасын қуанышқа бөлейтін кездері көп. Өткен аптада «Эвертон» қақпашысы Тим Ховардтың «Болтонға» соққан голы әлем жанкүйерлерін футбол сиқырына тағы да елітіп қойды. Жалпы, футбол тарихында ең көп гол соққан қақпашылар кімдер? Әлем футболының бай тарихында шабуылшыдан да көп гол соққан қақпашылар жетіп-артылады. Гол соғудан ат оздырғандар арасында парагвайлық Хосе Луис Чилаверттің шоқтығы қашанда биік. Ол 62 рет қарсы қақпадағы әріптесін мұңайтқан екен. «Чива» – хет-трик жасаған әлемдегі жалғыз қақпашы. Бірақ көш басында қақпашылық ғұмырында 101 доп соққан Рожерио Сени тұр. Рожерио айып добының қас шебері болатын. Қарсылас қақпасын айып алаңынан көздеуде Рожерио небір майталмандардың талайын қою шаңда қалдырды. Алайда Чилаверт секілді Сени де әлем чемпионатында доп соға алмағанына өкінеді. Өз қақпасын күзетіп, өзгенің қақпасынан саңылау тапқандар арасында 39 доп соққан перулік Джонни Вегас Фернандес пен сальвадорлық Мисаель Альфаро, 32 гол енгізген неміс қақпашысы Ханс-Йорг Бутт, 38 рет қарсы қақпадағы әріптесін «жылатқан» колумбиялық Хосе Реге Иниталардың еңбегі ерекше. Ал өткен аптада «Болтонға» гол соққан «Эвертонның» қақпашысы Тим Ховард ағылшын премьер-лигасында гол соққан төртінші қақпашы екен.
