Махаббат – махаббат па жылатпаса?
Махаббат – махаббат па, сағынбасаң,
Күн ойлап, түн уайымға салынбасаң?
Сағыныш – сағыныш па, елес ойнап,
Сағымдар сындырмаса сағыңды сан.
Сұлулық – сұлулық па табынбасаң?
Шын сұлу кез-келгенге салынбас ән.
Сүйісу – жалықтырмас, сені сүйген -
Сүйіктіңмен ләззат ап жалындасаң.
Бақыт па, – бақыт іздей сабылмасаң?
Арманда жеткізгенше бағың қашан.
Адам ба адам, – армандамаса?
Үмітке белшесінен малынбаса.
Өмір ме, өмір сүріп шалынбасаң?
Көнесің, «Тағдыр»- атты барында заң.
Тағдыр ма? Тағдыр деген қырсықпаса.
Бағынбасаң болмайды, бағынбасаң.
Ақын ба – ақын? Ғашық боп аһ ұрмасаң,
Күрсіну беретіндей ақынға сән.
Махаббат – махаббат па жылатпаса?
- Оһ жаным, сабыр сақта, ақылға сал.
